టీమిండియా కోచ్‌గా వీవీఎస్ లక్ష్మణ్

ఆసియా క్రీడలు-2026లో పాల్గొనబోయే భారత పురుషుల క్రికెట్ జట్టుకు వీవీఎస్ లక్ష్మణ్ ప్రధాన కోచ్‌గా వ్యవహరించనున్నారు. ఈ మేరకు కేంద్ర క్రీడల శాఖ ఆమోదం తెలిపినట్లు సమాచారం. టీమిండియా హెడ్ కోచ్ గౌతమ్ గంభీర్ స్థానంలో లక్ష్మణ్ ఈ బాధ్యతలను నిర్వర్తించనున్నారు. ఆసియా క్రీడల సమయంలోనే భారత జట్టు వెస్టిండీస్‌తో వన్డే సిరీస్‌లో తలపడనున్న నేపథ్యంలో, గంభీర్ స్వదేశంలోనే ఉండనున్నారని బీసీసీఐ తెలిపింది. దీంతో ఆసియా క్రీడల్లో భారత జట్టుకు కోచింగ్ బాధ్యతలను లక్ష్మణ్ చేపట్టనున్నారు.

జపాన్‌లోని ఐచి-నగోయా వేదికగా సెప్టెంబర్ 19 నుంచి అక్టోబర్ 4 వరకు ఆసియా క్రీడలు జరగనున్నాయి. ఈ టోర్నీలో భారత పురుషుల క్రికెట్ జట్టు నేరుగా క్వార్టర్ ఫైనల్ నుంచి పోటీలోకి దిగనుంది. భారత క్రికెట్‌కు గతంలో కీలక సేవలు అందించిన లక్ష్మణ్‌కు ఈ బాధ్యత అప్పగించడం ప్రాధాన్యత సంతరించుకుంది. ఆసియా క్రీడల్లో టీమిండియాను విజయపథంలో నడిపించేందుకు ఆయన వ్యూహాలు రూపొందించనున్నారు.