నీటి వినియోగంపై అదానీ-గూగుల్ కీలక నిర్ణయం

ఆంధ్రప్రదేశ్‌ను కీలక డేటా హబ్‌గా మార్చే దిశగా చేపట్టిన ప్రాజెక్టులలో పర్యావరణ పరిరక్షణకు పెద్దపీట వేస్తున్నారు. విశాఖపట్నంలో అదానీ కనెక్ట్స్, గూగుల్ సంయుక్తంగా నిర్మిస్తున్న భారీ డేటా సెంటర్లలో నీటి వినియోగాన్ని గణనీయంగా తగ్గించేందుకు అత్యాధునిక ఎయిర్-కూల్డ్ టెక్నాలజీని ఉపయోగించనున్నట్లు సంస్థ ప్రకటించింది. ముదసర్లోవ, తర్లువాడ ప్రాంతాల్లో ఏర్పాటు చేయనున్న ఈ క్యాంపస్‌లలో ఈ కొత్త విధానాన్ని అమలు చేయనున్నారు.

సాధారణంగా డేటా సెంటర్ల నిర్వహణకు, కూలింగ్ వ్యవస్థలకు భారీ పరిమాణంలో మంచినీరు అవసరమవుతుంది. అయితే, దీనికి భిన్నంగా ఎయిర్-కూలింగ్ టెక్నాలజీని వాడటం ద్వారా నీటి అవసరాన్ని దాదాపుగా తొలగించనున్నారు. ఈ ప్రాజెక్టులన్నింటిలో కలిపి మొత్తం మంచినీటి వినియోగం ఒక ఒలింపిక్ స్విమ్మింగ్ పూల్ పరిమాణం కంటే తక్కువగానే ఉంటుందని అంచనా. ఇందులో కూడా 80 శాతం నీటిని కేవలం ఉద్యోగుల సౌకర్యాలు, వంటగదులు, పచ్చదనం పెంపకం వంటి అవసరాలకే కేటాయించనున్నారు.

ఈ ప్రాజెక్టులు ముదసర్లోవ రిజర్వాయర్, కంబాలకొండ వన్యప్రాణుల అభయారణ్యం సమీపంలో ఉండటంతో నీటి వనరులపై ప్రభావం చూపుతాయనే ఆందోళనలు వ్యక్తమయ్యాయి. ఈ నేపథ్యంలో, గృహ అవసరాలకు వినియోగించే నీటి వనరులపై ఆధారపడకుండా, ప్రత్యేకంగా ఏర్పాటు చేసిన ఇండస్ట్రియల్ వాటర్ కనెక్షన్ల ద్వారానే నీటిని సేకరించనున్నట్లు కంపెనీ స్పష్టం చేసింది. అంతేకాకుండా, 'జీరో-డిశ్చార్జ్' విధానాన్ని పాటిస్తూ, ప్రాజెక్టులో వెలువడే మురుగునీటిని ఆన్‌సైట్ ప్లాంట్‌లో శుద్ధి చేసి, ఇరిగేషన్, ఫ్లషింగ్ వంటి అవసరాలకు తిరిగి వినియోగిస్తారు. శుద్ధి చేసిన నీటిని కూడా ముదసర్లోవ రిజర్వాయర్‌లోకి వదిలే ప్రసక్తే లేదని హామీ ఇచ్చారు.

అదానీ ఎంటర్‌ప్రైజెస్, ఎడ్జ్‌కనెక్ట్స్ సంస్థల జాయింట్ వెంచరే ఈ అదానీ కనెక్ట్స్. గూగుల్‌తో కలిసి దాదాపు 1 గిగావాట్ సామర్థ్యంతో హైపర్‌స్కేల్ డేటా సెంటర్లను అభివృద్ధి చేయడమే లక్ష్యంగా ఈ సంస్థ పనిచేస్తోంది. ఈ ప్రాజెక్టులతో పాటు రిలయన్స్, ఎయిర్‌టెల్ వంటి సంస్థల కార్యకలాపాలతో విశాఖపట్నం త్వరలో దేశంలోనే ఒక ముఖ్యమైన డేటా సెంటర్, ఆర్టిఫిషియల్ ఇంటెలిజెన్స్ (AI) హబ్‌గా మారనుంది.