గ్లోబల్ ఏఐ పోటీలో చైనా మరో అడుగు

చైనా టెక్ దిగ్గజం అలీబాబా తన తాజా ఫ్లాగ్‌షిప్ లార్జ్ లాంగ్వేజ్ మోడల్ క్వెన్ 3.8 మ్యాక్స్ ప్రివ్యూ వెర్షన్‌ను విడుదల చేసింది. 2.4 ట్రిలియన్ పారామీటర్లతో రూపొందిన ఈ మోడల్ ప్రపంచంలోని అత్యాధునిక ఏఐ మోడళ్లతో సమాన స్థాయి పనితీరును అందిస్తుందని, ప్రస్తుతం ఆంత్రోపిక్ క్లాడ్ ఫేబుల్ 5 తర్వాతి స్థానంలో ఉందని కంపెనీ పేర్కొంది. డెవలపర్లు ప్రస్తుతం Qoder, QoderWork ప్లాట్‌ఫారమ్‌ల ద్వారా ఈ మోడల్‌ను ఉపయోగించవచ్చు. త్వరలో ఓపెన్ వెయిట్ వెర్షన్‌ను కూడా విడుదల చేయనున్నట్లు అలీబాబా వెల్లడించింది.

అమెరికాకు చెందిన ఓపెన్‌ఏఐ, గూగుల్, ఆంత్రోపిక్ వంటి సంస్థలకు పోటీగా చైనా ఏఐ రంగాన్ని మరింత బలోపేతం చేసే ప్రయత్నాల్లో ఈ విడుదల కీలకంగా మారింది. ఓపెన్ సోర్స్ విధానాన్ని ప్రోత్సహిస్తున్న చైనా, డెవలపర్లు ఏఐ మోడళ్లను స్వేచ్ఛగా డౌన్‌లోడ్ చేసి అభివృద్ధి చేసుకునే అవకాశాన్ని కల్పిస్తోంది. ఇటీవల మూన్‌షాట్ ఏఐ విడుదల చేసిన కిమి K3 మోడల్ తర్వాత అలీబాబా ఈ కొత్త మోడల్‌ను ఆవిష్కరించింది. అలాగే చైనాలో యాపిల్ ఇంటెలిజెన్స్ సేవల్లో అలీబాబా, బైడు ఏఐ మోడళ్లను ఉపయోగించనున్నట్లు సమాచారం రావడంతో క్వెన్ మోడళ్ల వినియోగం మరింత విస్తరించే అవకాశాలు కనిపిస్తున్నాయి.