క్లాడ్ ఫేబుల్ 5 వినియోగంపై ఆంథ్రోపిక్ కీలక మార్పులు..

ఆంథ్రోపిక్ తన అత్యాధునిక AI మోడల్ క్లాడ్ ఫేబుల్ 5 వినియోగానికి సంబంధించిన సబ్‌స్క్రిప్షన్ విధానంలో కీలక మార్పులను ప్రకటించింది. జూలై 20 నుంచి అమల్లోకి వచ్చే ఈ కొత్త విధానం ప్రకారం క్లాడ్ మ్యాక్స్, టీమ్ ప్రీమియం సభ్యులు 50 శాతం వినియోగ పరిమితితో సేవలను కొనసాగించగలరు. అయితే ప్రో, టీమ్ స్టాండర్డ్ సభ్యులకు సబ్‌స్క్రిప్షన్ ద్వారా ఫేబుల్ 5 అందుబాటులో ఉండదు. వారు ఇకపై API ఆధారిత వినియోగ చార్జీలు చెల్లించి సేవలను ఉపయోగించాల్సి ఉంటుంది. మార్పును సులభతరం చేసేందుకు అర్హులైన వినియోగదారులకు ఒకసారి మాత్రమే 100 డాలర్ల వినియోగ క్రెడిట్ ఇవ్వనున్నట్లు సంస్థ తెలిపింది.

గత కొన్ని నెలలుగా ఈ నిర్ణయాన్ని పలుమార్లు వాయిదా వేసిన ఆంథ్రోపిక్, పెరుగుతున్న వినియోగ డిమాండ్‌ను సమర్థవంతంగా నిర్వహించడానికే ఈ మార్పులు చేపట్టినట్లు వెల్లడించింది. AI రంగంలో పెరుగుతున్న పోటీ, అధిక కంప్యూటింగ్ మౌలిక సదుపాయాల వ్యయం కూడా ఈ నిర్ణయానికి కారణాలుగా భావిస్తున్నారు. ఇదే సమయంలో OpenAIతో పాటు చైనా AI సంస్థలు తక్కువ ధరలో అధిక సామర్థ్యమున్న కొత్త మోడళ్లను విడుదల చేస్తుండటంతో మార్కెట్లో పోటీ మరింత తీవ్రంగా మారింది.