మీ ఇంట్లోని స్మార్ట్ పరికరాలు హ్యాక్ కావచ్చు.. ఈ జాగ్రత్తలు తప్పనిసరి!

ఇంటర్నెట్‌కు అనుసంధానమైన స్మార్ట్ టీవీలు, ఫ్రిజ్‌లు, సెక్యూరిటీ కెమెరాలు, స్మార్ట్ లాక్‌లు, రూటర్లు సహా అనేక పరికరాలు సైబర్ నేరగాళ్లకు లక్ష్యాలుగా మారుతున్నాయి. ఇటీవల ఫ్రాన్స్‌లో దాదాపు 700 సూపర్‌మార్కెట్లలో కూలింగ్ వ్యవస్థలపై సైబర్ దాడి జరిగినట్లు వచ్చిన నివేదికలు ఈ ముప్పు తీవ్రతను మరోసారి గుర్తుచేస్తున్నాయి. దాడి కారణంగా రిఫ్రిజిరేషన్ సెట్టింగ్‌లు మారి, ఆహార పదార్థాలు పాడయ్యే పరిస్థితి ఏర్పడినట్లు సమాచారం. హ్యాకర్లు పరికరాల్లోని సమాచారాన్ని దొంగిలించడం, సెట్టింగ్‌లను మార్చడం, వాటి పనితీరుకు అంతరాయం కలిగించడం వంటి చర్యలకు పాల్పడవచ్చు. ఒక పరికరంలోకి చొరబడిన తర్వాత అదే నెట్‌వర్క్‌లోని ఇతర పరికరాలపైనా దాడి చేసే అవకాశం ఉంది.

కార్లు, విద్యుత్‌, నీటి సరఫరా వంటి కీలక మౌలిక సదుపాయాలకూ సైబర్ ముప్పులు ఉన్నప్పటికీ, వాటిలో అదనపు భద్రతా చర్యలు అమలులో ఉంటాయి. వ్యక్తిగత పరికరాలను రక్షించుకోవడానికి ప్రతి పరికరానికి ప్రత్యేకమైన, బలమైన పాస్‌వర్డ్‌ను ఏర్పాటు చేసుకోవాలి. టూ-ఫ్యాక్టర్ అథెంటికేషన్‌ను ప్రారంభించడంతో పాటు సాఫ్ట్‌వేర్‌ను ఎప్పటికప్పుడు అప్‌డేట్ చేయాలి. భద్రతా అప్‌డేట్‌లు అందని పాత పరికరాలను మార్చడం, స్మార్ట్ గృహోపకరణాల కోసం ప్రత్యేక నెట్‌వర్క్‌ను ఉపయోగించడం మంచిది. అవసరం లేని పరికరాలకు ఇంటర్నెట్ కనెక్షన్‌ను నిలిపివేయడం ద్వారా హ్యాకర్లకు అందుబాటులో ఉండే ప్రవేశ మార్గాలను తగ్గించవచ్చు.