భారీ సైబర్‌ భద్రతా లోపం.. గ్లోబల్ SSL/TLS సర్టిఫికెట్ వ్యాపారాన్ని నిలిపివేయనున్న eMudhra

బెంగళూరుకు చెందిన సైబర్‌ భద్రతా సంస్థ eMudhra తన గ్లోబల్ డిజిటల్ సర్టిఫికెట్ వ్యాపారాన్ని నిలిపివేయనున్నట్లు ప్రకటించింది. ఎనిమిది ఇంటర్మీడియట్ సర్టిఫికెట్లకు సంబంధించిన ప్రైవేట్ క్రిప్టోగ్రాఫిక్ కీలు బహిర్గతమైన భద్రతా లోపం నేపథ్యంలో ఈ నిర్ణయం తీసుకుంది. ఈ పరిణామంతో ఇంటర్నెట్ భద్రతపై ఆందోళనలు పెరగగా, గూగుల్, యాపిల్, మైక్రోసాఫ్ట్, మొజిల్లా వంటి ప్రముఖ బ్రౌజర్ సంస్థలు ప్రభావిత సర్టిఫికెట్లను బ్లాక్ చేశాయి. డేటా సార్వభౌమత్వానికి సంబంధించిన నిబంధనలు, పెరుగుతున్న అనుసరణ ఖర్చులు, నిర్వహణలోని సంక్లిష్టత, వ్యాపార వ్యయాలు ఈ నిర్ణయానికి కారణమని eMudhra తెలిపింది. తన గ్లోబల్ SSL/TLS సర్టిఫికెట్ వ్యాపారం మొత్తం ఆదాయంలో సుమారు ఒక శాతం మాత్రమేనని పేర్కొంది.

భద్రతా లోపాన్ని గుర్తించిన 14 గంటల్లోనే ప్రభావిత సర్టిఫికెట్లను రద్దు చేసినట్లు సంస్థ వెల్లడించింది. తమ మౌలిక సదుపాయాలు హ్యాక్ కాలేదని, ఎలాంటి డేటా చోరీ జరగలేదని స్పష్టం చేసింది. బహిర్గతమైన కీలను దుర్వినియోగం చేసినట్లు ఇప్పటివరకు స్పష్టమైన ఆధారాలు లేనప్పటికీ, వాటి ద్వారా నకిలీ వెబ్‌సైట్ సర్టిఫికెట్లను రూపొందించే అవకాశం ఉండేదని సైబర్‌ భద్రతా నిపుణులు హెచ్చరించారు. ఈ ఘటనపై దర్యాప్తు పూర్తయ్యాక కారణాలను వెల్లడించే నివేదికను విడుదల చేస్తామని, మార్పిడి సమయంలో ప్రభావిత సర్టిఫికెట్ల స్థానంలో కొత్తవాటిని ఉచితంగా అందిస్తామని eMudhra తెలిపింది. భారత్‌లోని డిజిటల్ సంతకాలు, eSign, ఇతర సంతకం సేవలపై ఈ ఘటన ప్రభావం లేదని, అవి యథావిధిగా కొనసాగుతాయని స్పష్టం చేసింది.