సంక్లిష్ట వ్యాధుల నిర్ధారణలో వైద్యుల కంటే రెండింతలకుపైగా కచ్చితత్వం.. మైక్రోసాఫ్ట్ ఏఐ వ్యవస్థ

వైద్యులు అనుసరించే దశలవారీ వ్యాధి నిర్ధారణ ప్రక్రియను అనుకరించేలా మైక్రోసాఫ్ట్ పరిశోధకులు ఒక కృత్రిమ మేధ (ఏఐ) వ్యవస్థను అభివృద్ధి చేశారు. సైన్స్ జర్నల్‌లో ప్రచురితమైన అధ్యయనం ప్రకారం, సంక్లిష్టమైన, అరుదైన వైద్య కేసులను విశ్లేషించడంలో ఈ వ్యవస్థ సాధారణ వైద్యుల కంటే రెండింతలకుపైగా కచ్చితత్వాన్ని ప్రదర్శించింది. సాధారణ వైద్య ఏఐ సాధనాలు రోగి లక్షణాలు, పరీక్షల ఫలితాలు, స్కాన్లను ఒకేసారి విశ్లేషించి నిర్ధారణకు వస్తాయి. అయితే, మైక్రోసాఫ్ట్ రూపొందించిన వ్యవస్థలో ప్రత్యేకమైన ‘ఆర్కెస్ట్రేటర్’ వివిధ వైద్య నిపుణుల పాత్రలను అనుకరించే ఏఐ నమూనాల పనిని సమన్వయం చేస్తుంది. రోగి వైద్య చరిత్రను పరిశీలించడం, అవసరమైన ప్రశ్నలు అడగడం, శారీరక పరీక్షల వివరాలను విశ్లేషించడం, తగిన పరీక్షలను సూచించడం వంటి దశల ద్వారా వ్యాధి నిర్ధారణకు చేరుకుంటుంది.

300కు పైగా క్లిష్టమైన వైద్య కేసులపై నిర్వహించిన పరీక్షల్లో ఈ వ్యవస్థ మెరుగైన ఫలితాలు సాధించిందని పరిశోధకులు తెలిపారు. అత్యవసర విభాగాల్లో చేరిన రోగులకు సంబంధించిన కేసులను విశ్లేషించినప్పుడూ ఇది వైద్యుల కంటే మెరుగ్గా పనిచేసినట్లు అధ్యయనం వెల్లడించింది. అంతేకాకుండా, ఏఐ రూపొందించిన నిర్ధారణ ప్రక్రియలకు అయ్యే ఖర్చు వైద్యులు నిర్వహించే ప్రక్రియల కంటే తక్కువగా ఉండే అవకాశం ఉందని పరిశోధకులు గుర్తించారు. అయితే, ఈ ఫలితాల ఆధారంగా వైద్యుల స్థానాన్ని ఏఐ భర్తీ చేయగలదని నిర్ధారించలేం. అత్యవసర విభాగాల నిరీక్షణ గదుల్లో రోగులకు ప్రాధాన్యత క్రమాన్ని నిర్ణయించడంలో ఈ సాంకేతికత ఎంత సమర్థంగా పనిచేస్తుందో తెలుసుకునేందుకు మైక్రోసాఫ్ట్ బృందం బోస్టన్‌లోని బెత్ ఇజ్రాయెల్ డీకనెస్ మెడికల్ సెంటర్‌తో కలిసి తదుపరి పరీక్షలు నిర్వహించనుంది.