మీరా మురాటి సంస్థ నుంచి ‘ఇంక్‌లింగ్’ ఏఐ మోడల్..

ఓపెన్‌ఏఐ మాజీ చీఫ్ టెక్నాలజీ ఆఫీసర్ మీరా మురాటి స్థాపించిన థింకింగ్ మెషీన్స్ ల్యాబ్ తన తొలి స్వదేశీ కృత్రిమ మేధ (ఏఐ) మోడల్ ‘ఇంక్‌లింగ్’ను విడుదల చేసింది. కోడింగ్, రీజనింగ్, ఏజెంటిక్ పనులతో పాటు వినియోగదారులు అవసరాన్ని బట్టి ఆలోచనా సామర్థ్యాన్ని నియంత్రించుకునే కంట్రోలబుల్ థింకింగ్ ఫీచర్‌తో ఈ మోడల్‌ను రూపొందించారు. ప్రముఖ ఏఐ సంస్థలు అనుసరిస్తున్న క్లోజ్డ్ మోడల్ విధానానికి భిన్నంగా, ఓపెన్-వెయిట్ లైసెన్స్ కింద ఈ మోడల్‌ను అందుబాటులోకి తీసుకువచ్చింది. దీంతో డెవలపర్లు, సంస్థలు దీనిని డౌన్‌లోడ్ చేసుకుని తమ అవసరాలకు అనుగుణంగా మార్చుకునే అవకాశం ఉంటుంది.

975 బిలియన్ పారామీటర్ల సామర్థ్యంతో రూపొందిన ఇంక్‌లింగ్, మిక్స్చర్ ఆఫ్ ఎక్స్‌పర్ట్స్ (MoE) నిర్మాణాన్ని ఉపయోగిస్తుంది. ఒక్కో పనికి సుమారు 41 బిలియన్ యాక్టివ్ పారామీటర్లను మాత్రమే వినియోగించడం వల్ల వేగం, సామర్థ్యం పెరుగుతాయి. ఒక మిలియన్ టోకెన్ల కాంటెక్స్ట్ విండోతో పాటు టెక్స్ట్, చిత్రాలు, ఆడియో, వీడియోలపై మొత్తం 45 ట్రిలియన్ టోకెన్లతో శిక్షణ పొందింది. ఈ మోడల్‌ను పూర్తిగా ఎన్విడియా GB300 NVL72 సిస్టమ్‌లపై శిక్షణ ఇచ్చారు. అదనంగా తక్కువ ఖర్చుతో వేగంగా పనిచేసే ఇంక్‌లింగ్-స్మాల్ మోడల్‌ను కూడా సంస్థ పరిచయం చేసింది.