చాట్‌జీపీటీలో కొత్త హెల్త్ ఫీచర్..

ఓపెన్‌ఏఐ తన చాట్‌జీపీటీ హెల్త్ సేవలను అమెరికాలో విస్తరించింది. జనవరిలో ప్రారంభించిన ఎర్లీ యాక్సెస్ దశ అనంతరం, ప్రస్తుతం అమెరికాలో 18 ఏళ్లు పైబడిన అర్హులైన ఫ్రీ, గో, ప్లస్, ప్రో వినియోగదారులకు వెబ్, iOSలో ఈ ఫీచర్‌ను దశలవారీగా అందుబాటులోకి తీసుకొస్తోంది. ప్రస్తుతం Codexలో హెల్త్ కు సపోర్ట్ లేదు. సాధారణ ఆరోగ్య సంబంధిత ప్రశ్నలు అడగడానికి ఇతర యాప్‌లను కనెక్ట్ చేయాల్సిన అవసరం లేదు. అయితే వ్యక్తిగత ఆరోగ్య సమాచారానికి అనుగుణంగా సమాధానాలు పొందాలనుకునే వారు యాపిల్ హెల్త్‌తో పాటు సపోర్ట్ ఉన్న మెడికల్ రికార్డులను అనుసంధానించుకోవచ్చు. ల్యాబ్ ఫలితాలు, మందులు, నిద్ర, యాక్టివిటీ వంటి సమాచారాన్ని ఒకేచోట పరిశీలించడంతో పాటు ఆరోగ్య ధోరణులను అర్థం చేసుకోవడం, డాక్టర్ అపాయింట్‌మెంట్‌కు సిద్ధమవడం వంటి అవసరాలకు ఇది ఉపయోగపడుతుందని ఓపెన్‌ఏఐ తెలిపింది.

వినియోగదారులు ఏ ఆరోగ్య సమాచారాన్ని అనుసంధానించాలి, దాన్ని చాట్‌జీపీటీ ఎప్పుడు ఉపయోగించాలి అనే అంశాలపై నియంత్రణ కలిగి ఉంటారని ఓపెన్‌ఏఐ పేర్కొంది. కనెక్ట్ చేసిన మెడికల్ రికార్డులు, యాపిల్ హెల్త్ సమాచారం, వాటిని ఉపయోగించిన సంభాషణలను తమ ఫౌండేషన్ మోడళ్ల శిక్షణకు లేదా ప్రకటనల లక్ష్యీకరణకు ఉపయోగించబోమని స్పష్టం చేసింది. ప్రతి వారం 300 మిలియన్లకు పైగా మంది చాట్‌జీపీటీ లో ఆరోగ్య సంబంధిత ప్రశ్నలు అడుగుతున్నారని కంపెనీ తెలిపింది. సంక్లిష్ట ఆరోగ్య ప్రశ్నలకు మెరుగైన సమాధానాలు అందించే దిశగా జీపీటీ-5.6 Sol వంటి మోడళ్లను అభివృద్ధి చేస్తున్నట్లు పేర్కొంది. అయితే చాట్‌జీపీటీ హెల్త్ వైద్య సేవలు, నిర్ధారణ లేదా చికిత్సకు ప్రత్యామ్నాయం కాదని ఓపెన్‌ఏఐ స్పష్టం చేసింది.