

ఇటీవల సెకండరీ మార్కెట్లు పుంజుకోవడంతో ప్రైమరీ మార్కెట్లకు కూడా ఊతం లభిస్తోంది. దీంతో మరిన్ని కంపెనీలు స్టాక్ మార్కెట్లలో లిస్టింగ్ అయ్యేందుకు ఆసక్తి చూపుతున్నాయి. ఈ క్రమంలో తాజాగా రెండు సంస్థలు క్యాపిటల్ మార్కెట్ల నియంత్రణ సంస్థ సెబీకి అప్డేటెడ్, ముసాయిదా ప్రాస్పెక్టస్లను దాఖలు చేశాయి. ఇంటర్నెట్ సేవల సంస్థ రెడిఫ్.కామ్ ఇండియా, ఏఐ ఇన్ఫ్రాస్ట్రక్చర్ సేవల సంస్థ మెగానెట్ టెక్నాలజీస్ గ్లోబల్ ఐపీఓ ద్వారా నిధులు సమీకరించేందుకు సిద్ధమవుతున్నాయి.
రెడిఫ్.కామ్ ఇండియా పబ్లిక్ ఇష్యూ ద్వారా రూ. 600 కోట్లు సమీకరించాలని లక్ష్యంగా పెట్టుకుంది. ఇందుకోసం కొత్త ఈక్విటీ షేర్లను జారీ చేయనుంది. సమీకరించిన నిధుల్లో రూ. 225 కోట్లను పెట్టుబడి వ్యయాలకు వినియోగించనుంది. రెడిఫ్ వన్, రెడిఫ్ పే, రెడిఫ్ టీవీ ప్లాట్ఫామ్ల అభివృద్ధి, విస్తరణకు ఈ మొత్తాన్ని ఖర్చు చేయనుంది. మరో రూ. 183 కోట్లను మార్కెటింగ్, బ్రాండింగ్ కార్యకలాపాలకు కేటాయించనుంది. మిగిలిన మొత్తాన్ని ఇతర సంస్థల కొనుగోళ్లు, సాధారణ కార్పొరేట్ అవసరాలకు వినియోగించనుంది. అవెన్యూస్ఏఐ లిమిటెడ్ (గతంలో ఇన్ఫీబీమ్ అవెన్యూస్) అనుబంధ సంస్థ అయిన రెడిఫ్.కామ్ ఇండియా 1996లో ప్రారంభమైంది. తొలుత ఇంటర్నెట్ పోర్టల్, డిజిటల్ మీడియా సంస్థగా సేవలు అందించిన ఈ కంపెనీ, తర్వాత ఈమెయిల్, డిజిటల్ చెల్లింపులు, ఎంటర్ప్రైజ్ సాఫ్ట్వేర్, మొబైల్ అప్లికేషన్లు, ఈ-కామర్స్ రంగాల్లోకి విస్తరించింది. 2025 జూలైలో రెడిఫ్ టీవీని ప్రారంభించగా, అదే ఏడాది డిసెంబర్లో ఎన్పీసీఐ అనుమతి అనంతరం రెడిఫ్ పే సేవలను అందుబాటులోకి తెచ్చింది. గోప్యమైన దాఖలు విధానంలో ఆగస్టులో సెబీ అనుమతి పొందిన సంస్థ తాజాగా అప్డేటెడ్ ప్రాస్పెక్టస్ను సమర్పించింది.
మరోవైపు, మెగానెట్ టెక్నాలజీస్ గ్లోబల్ ఐపీఓ ద్వారా రూ. 740 కోట్లు సమీకరించేందుకు సిద్ధమైంది. ఇందులో రూ. 140 కోట్ల విలువైన తాజా ఈక్విటీ జారీతోపాటు, ప్రమోటర్లు రూ. 600 కోట్ల విలువైన షేర్లను విక్రయించనున్నారు. తాజా ఈక్విటీ జారీ ద్వారా వచ్చే నిధుల్లో రూ. 100 కోట్లను వర్కింగ్ క్యాపిటల్ అవసరాలకు, రూ. 11 కోట్లను రుణాల చెల్లింపులకు, మిగిలిన మొత్తాన్ని సాధారణ కార్పొరేట్ అవసరాలకు వినియోగించనుంది. ఈ సంస్థ ఏఐ సర్వర్లు, వర్క్స్టేషన్లు, డేటా సెంటర్ పరిష్కారాలు, హైఎండ్ కంప్యూటింగ్ సిస్టమ్స్, స్టోరేజీ సొల్యూషన్లు, సాఫ్ట్వేర్ సేవలను అందిస్తోంది. ప్రపంచవ్యాప్తంగా 2,600కు పైగా కస్టమర్లకు సేవలు అందిస్తున్న ఈ సంస్థకు నవీముంబైలోని మహాపేలో సర్వర్ల తయారీ కేంద్రం ఉంది. ఈ కేంద్రం వార్షిక ఉత్పత్తి సామర్థ్యం 5,928 సర్వర్లు కాగా, 2025–26లో 2,621 సర్వర్లను తయారు చేసింది. అదే ఆర్థిక సంవత్సరంలో రూ. 447 కోట్ల ఆదాయం, రూ. 38 కోట్ల నికర లాభాన్ని నమోదు చేసింది. అంతకుముందు ఏడాది రూ. 368 కోట్ల ఆదాయం, రూ. 30 కోట్ల నికర లాభం ఆర్జించింది. ఫ్రాస్ట్ అండ్ సల్లివాన్ నివేదిక ప్రకారం, ప్రస్తుతం రూ. 45,510 కోట్లుగా ఉన్న దేశీయ ఏఐ సర్వర్ల మార్కెట్ 2032 నాటికి రూ. 1,82,820 కోట్లకు చేరుతుందని అంచనా. అంటే ఈ రంగం ఏటా 26 శాతం వృద్ధి సాధించే అవకాశముంది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!