భారత్‌కు అవసరమైన వాటిని నిర్మిస్తాం.. టాటా సన్స్ ఛైర్మన్ కీలక వ్యాఖ్యలు

భారత్‌కు అవసరమైన పరిశ్రమలు, సాంకేతికతలను అభివృద్ధి చేయడంలో టాటా గ్రూప్‌ తన ప్రయత్నాలను కొనసాగిస్తుందని టాటా సన్స్ ఛైర్మన్ ఎన్. చంద్రశేఖరన్ తెలిపారు. అవసరమైన లక్ష్యాలను సాధించేందుకు ఎక్కువ సమయం పట్టినా వెనుకడుగు వేయబోమని స్పష్టం చేశారు. 2026 బ్లూమ్‌బెర్గ్ న్యూ ఎకానమీ ఫోరమ్‌లో మాట్లాడిన ఆయన.. భారత్‌కు స్పష్టమైన దిశ, అవసరాలు, అమలు సామర్థ్యం ఉన్నాయని పేర్కొన్నారు. దేశంలో ప్రతిభావంతులైన నిపుణులు, విస్తృత దేశీయ మార్కెట్, కీలక పరిశ్రమలను నిర్మించగల సామర్థ్యం ఉన్నాయని వివరించారు.

అధునాతన తయారీ రంగం విస్తరిస్తున్న నేపథ్యంలో సెమీకండక్టర్ చిప్‌లకు ప్రపంచవ్యాప్తంగా ప్రాధాన్యం పెరుగుతోందని చంద్రశేఖరన్ అన్నారు. దేశంలో అందుబాటులో ఉన్న నైపుణ్యాలు, భారీ మార్కెట్ కారణంగా ప్రపంచ సెమీకండక్టర్ పరిశ్రమలో భారత్ తన పాత్రను మరింత బలోపేతం చేసుకునే అవకాశముందని తెలిపారు. అయితే, ఈ రంగంలో పెట్టుబడులు పెంచే సమయంలో కంపెనీలు మార్కెట్ డిమాండ్‌ను జాగ్రత్తగా అంచనా వేసి, పెట్టుబడులను సమర్థంగా నిర్వహించాలని సూచించారు. దీర్ఘకాలిక అవసరాలను దృష్టిలో ఉంచుకుని దేశానికి అవసరమైన సాంకేతిక సామర్థ్యాలను అభివృద్ధి చేయడం ముఖ్యమని ఆయన అభిప్రాయపడ్డారు.