

బిజినెస్ క్లాస్ విమాన టికెట్లు తక్కువ ధరకు బుక్ చేస్తామంటూ నమ్మించిన సైబర్ మోసగాళ్లు సినీ నటి గోగినేని అనితను రూ.4,14,180 మేర మోసం చేశారు. ఈ ఘటన ఆలస్యంగా వెలుగులోకి వచ్చింది. హైదరాబాద్లోని మాదాపూర్ కావూరి హిల్స్లో నివసించే అనిత.. అమెరికాలోని వాషింగ్టన్లో ఉంటున్న తన కుమారుడి పుట్టినరోజు వేడుకల్లో పాల్గొనేందుకు ప్రయాణ ఏర్పాట్లు చేసుకున్నారు. ఈ క్రమంలో విమాన టికెట్లు బుక్ చేసేందుకు ఆన్లైన్లో ట్రావెల్ ఏజెంట్ కోసం వెతికారు. అప్పుడు ‘లో ఫ్లై టూర్స్ అండ్ ట్రావెల్స్’ సంస్థకు చెందిన వ్యక్తిగా పరిచయం చేసుకున్న రాజేష్ ఆమెను సంప్రదించాడు. తమ వద్ద బిజినెస్ క్లాస్ టికెట్లు తక్కువ ధరకు లభిస్తాయని నమ్మించి, వాషింగ్టన్ ప్రయాణానికి రూ.4,14,180 అవుతుందని చెప్పాడు. టికెట్ బుకింగ్ కోసం డెబిట్ కార్డు వివరాలు ఇవ్వాలని కోరాడు.
అతడి మాటలను నమ్మిన అనిత.. తన డెబిట్ కార్డు వివరాలతో పాటు, టికెట్ బుకింగ్ కోసమేనని భావించి ఓటీపీని కూడా వెల్లడించారు. కొద్దిసేపటికే ఆమె బ్యాంకు ఖాతా నుంచి ‘క్లియర్ ట్రిప్’ పేరుతో రూ.4,14,180 డెబిట్ అయ్యాయి. అయితే డబ్బులు కట్ అయినప్పటికీ విమాన టికెట్ బుకింగ్కు సంబంధించిన నిర్ధారణ సమాచారం గానీ, ఈ-టికెట్ గానీ అందలేదు. దీంతో అనుమానం వచ్చిన అనిత తాను సైబర్ మోసానికి గురైనట్లు గుర్తించి వెంటనే పోలీసులను ఆశ్రయించారు. ఆమె ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు. ఆన్లైన్లో ట్రావెల్ ఏజెన్సీలను సంప్రదించే సమయంలో ప్రజలు అప్రమత్తంగా ఉండాలని అధికారులు సూచిస్తున్నారు. గుర్తుతెలియని వ్యక్తులకు బ్యాంకు ఖాతా, డెబిట్ లేదా క్రెడిట్ కార్డు వివరాలు, ఓటీపీలను ఎట్టి పరిస్థితుల్లోనూ వెల్లడించవద్దని హెచ్చరిస్తున్నారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!