దీపావళి వరకు ఢిల్లీలో నిరసనలను నిషేధించాలి అమిత్ షాకు సీటీఐ విజ్ఞప్తి

దీపావళి పండుగ వరకు దేశ రాజధాని ఢిల్లీలో నిరసన కార్యక్రమాలను నిషేధించాలని ఛాంబర్ ఆఫ్ ట్రేడ్ అండ్ ఇండస్ట్రీ (సీటీఐ) కేంద్ర హోంమంత్రి అమిత్ షాను కోరింది. పండుగ సీజన్‌లో వ్యాపార కార్యకలాపాలు జోరుగా సాగుతాయని, ఈ సమయంలో నిరసనలు, ర్యాలీల వల్ల వాణిజ్యానికి ఆటంకాలు ఏర్పడే ప్రమాదం ఉందని వాణిజ్య సంఘం ఆందోళన వ్యక్తం చేసింది. సీజన్‌లో వ్యాపారాలకు అంతరాయం కలిగితే ఆర్థికంగా తీవ్ర నష్టం వాటిల్లవచ్చని పేర్కొంది.

సీజన్‌లో సిటిజన్స్ ఫర్ జస్టిస్ అండ్ పీస్ (సీజేపీ) చేపట్టనున్న ర్యాలీలు వ్యాపార కార్యకలాపాలను ప్రభావితం చేయవచ్చని సీటీఐ హెచ్చరించింది. ఇటీవల జరిగిన నిరసనల కారణంగా సుమారు రూ.2,000 కోట్ల మేర నష్టం వాటిల్లినట్లు అంచనా వేసింది. పండుగ సమయంలో వ్యాపారాలు, స్థానిక ఆర్థిక వ్యవస్థపై ప్రతికూల ప్రభావం పడకుండా చర్యలు తీసుకోవాలని కేంద్ర హోంమంత్రిని కోరింది.