బార్ల యజమానుల పిటిషన్లపై హైకోర్టు కీలక నిర్ణయం

రాష్ట్రంలోని బార్లు, రెస్టారెంట్ల నుంచి స్పెషల్ ప్రివిలేజ్ ఫీ వసూలు చేయాలనే ఉద్దేశంతో అక్టోబర్ 19న ఎక్సైజ్ శాఖ జారీ చేసిన జీవో నంబర్ 205 అమలుపై హైకోర్టు తాత్కాలికంగా స్టే విధించింది. ఈ జీవో అమలును నాలుగు వారాలపాటు నిలిపివేస్తూ మధ్యంతర ఉత్తర్వులు జారీ చేసింది. ప్రభుత్వ నిర్ణయాన్ని వ్యతిరేకిస్తూ పలువురు బార్ల యజమానులు హైకోర్టును ఆశ్రయించారు. స్పెషల్ ప్రివిలేజ్ ఫీ వసూలు చేయడాన్ని సవాలు చేస్తూ పిటిషన్లు దాఖలు చేశారు. దీంతో ఈ వ్యవహారం న్యాయస్థానంలో విచారణకు వచ్చింది.

ఈ పిటిషన్లపై జస్టిస్ ఎన్. రాజేశ్వర్‌రావు ధర్మాసనం విచారణ చేపట్టింది. ఇరువర్గాల వాదనలు విన్న అనంతరం స్పెషల్ ప్రివిలేజ్ ఫీ వసూలుకు సంబంధించిన జీవో అమలును నాలుగు వారాలపాటు నిలిపివేస్తూ మధ్యంతర ఉత్తర్వులు జారీ చేసింది. ఈ వ్యవహారంపై వివరణ ఇవ్వాలని ఎక్సైజ్ శాఖకు నోటీసులు జారీ చేసింది. తదుపరి విచారణను నాలుగు వారాలకు వాయిదా వేసింది. హైకోర్టు తాజా ఆదేశాలతో స్పెషల్ ప్రివిలేజ్ ఫీ వసూళ్ల విషయంలో బార్ల యజమానులకు తాత్కాలికంగా ఊరట లభించింది.