భవిష్యత్తు టెక్నాలజీల్లో భారత్‌ ప్రపంచానికి నాయకత్వం వహించాలి: మోదీ

భవిష్యత్తు సాంకేతికతలను భారత్‌ స్వీకరించడంతోపాటు, ఆవిష్కరణల్లో ధైర్యంగా ముందడుగు వేసి ప్రపంచానికి నాయకత్వం వహించాలని ప్రధానమంత్రి నరేంద్ర మోదీ పిలుపునిచ్చారు. శాస్త్ర, సాంకేతిక రంగాల్లో దేశం సరికొత్త ఆలోచనలు, ఆత్మవిశ్వాసంతో ముందుకు సాగుతోందని పేర్కొన్నారు. మంగళవారం జరిగిన ఎమర్జింగ్ సైన్స్, టెక్నాలజీ అండ్ ఇన్నోవేషన్ కాంక్లేవ్ (ఈఎస్‌టీఐసీ)-2026లో ఆయన ప్రసంగించారు. దేశంతో పాటు ప్రపంచానికి, ప్రస్తుత అవసరాలతోపాటు భవిష్యత్తు సవాళ్లకు పరిష్కారాలు చూపే సాంకేతికతలను అభివృద్ధి చేయడమే భారత్‌ లక్ష్యమని తెలిపారు. గతంలో ఇతర దేశాల్లో ఆవిష్కృతమైన సాంకేతికతలు భారత్‌కు చేరుకోవడానికి ఏళ్లు పట్టేవని, ఇప్పుడు దేశం సరికొత్త ఆలోచనలతో ముందుకు సాగుతోందని వివరించారు.

కృత్రిమ మేధ (ఏఐ) యుగంలో ఆర్థిక, జాతీయ భద్రతలకు సైబర్ ముప్పులు పెరుగుతున్నాయని మోదీ హెచ్చరించారు. జాతీయ వ్యవస్థలకు రక్షణ కల్పిస్తూ, మానవాళికి ఉపయోగపడే ఏఐ ఆధారిత క్వాంటమ్ పరిష్కారాలను అభివృద్ధి చేయాలని సూచించారు. వికసిత్ భారత్ లక్ష్య సాధనకు అణుశక్తి కీలకమని, అందుకే ఫాస్ట్ బ్రీడర్ రియాక్టర్ సాంకేతికతపై భారత్‌ పనిచేస్తోందని తెలిపారు. దేశంలో తయారైన చిప్‌లు ప్రపంచ మార్కెట్లకు చేరుతున్నాయని, బ్యాటరీ నిల్వ సామర్థ్యాన్ని పెంచేందుకు పరిశోధనలు కొనసాగుతున్నాయని వెల్లడించారు. అంతరిక్ష రంగంలో స్కైరూట్ సంస్థ విక్రమ్-1 ప్రయోగం, వైర్‌లెస్, ఉపగ్రహ సమాచార వ్యవస్థల అభివృద్ధిని ప్రస్తావించారు. గత ఏడాది ప్రభుత్వ రంగంలో పరిశోధనల కోసం రూ.12,000 కోట్లు ఖర్చు చేసినట్లు పేర్కొన్నారు.