రష్యా చమురుపై భారత్‌కు అమెరికా భారీ షాక్!

రష్యా నుంచి చమురు, సహజవాయువు, ఇతర ఉత్పత్తులను కొనుగోలు చేస్తున్న దేశాలపై 100 శాతం వరకు అదనపు సుంకాలు విధించే లక్ష్యంతో రూపొందించిన బిల్లును అమెరికా సెనేట్‌ భారీ మెజారిటీతో ఆమోదించింది. బిల్లుకు 86 మంది సెనేటర్లు అనుకూలంగా, 11 మంది వ్యతిరేకంగా ఓటేశారు. రష్యా నుంచి భారీగా ఇంధనాన్ని కొనుగోలు చేస్తున్న భారత్‌, చైనా, అజర్‌బైజాన్‌, హంగరీ, స్లోవేకియాపై భారీ సుంకాలు, ఆంక్షలు విధించే అధికారం అమెరికా అధ్యక్షుడికి కల్పించడమే ఈ బిల్లు ఉద్దేశం.

ఈ బిల్లు అమల్లోకి రావాలంటే అమెరికా ప్రతినిధుల సభ ఆమోదంతో పాటు అధ్యక్షుడు డొనాల్డ్ ట్రంప్‌ సంతకం అవసరం. ఉక్రెయిన్‌కు మద్దతు ఇవ్వడం, రష్యా ఆర్థిక వనరులను దెబ్బతీయడం లక్ష్యంగా ఈ ప్రతిపాదనను తీసుకొచ్చారు. రష్యా నుంచి భారత్‌ చౌక చమురు కొనుగోలు చేస్తుండటంపై అమెరికా ఇప్పటికే విమర్శలు చేస్తోంది. భారత్‌ చమురు దిగుమతుల్లో రష్యా వాటా 40 శాతానికి పైగానే ఉంది. అమెరికా-భారత్‌ వాణిజ్య ఒప్పందం కుదిరితే భారత్‌కు ఈ అదనపు సుంకాల నుంచి మినహాయింపు లభిస్తుందా అనేది ఆసక్తికరంగా మారింది.