మహాలక్ష్మి పథకం, పండుగ బస్సుల నిర్వహణలో ఎలాంటి లోటుపాట్లు లేవు: టీజీఎస్‌ఆర్టీసీ

మహాలక్ష్మి ఉచిత బస్సు ప్రయాణ పథకం, పండుగ ప్రత్యేక బస్సుల నిర్వహణపై బీఆర్‌ఎస్‌ డిప్యూటీ ఫ్లోర్‌ లీడర్‌, మాజీ మంత్రి హరీశ్‌రావు చేసిన ఆరోపణలకు టీజీఎస్‌ఆర్టీసీ యాజమాన్యం స్పందించింది. పండుగల సమయంలో టికెట్‌ ధరల పెంపు, ప్రత్యేక బస్సుల రద్దుకు సంబంధించి చేసిన ఆరోపణల్లో వాస్తవం లేదని స్పష్టం చేసింది. ప్రయాణికుల రద్దీకి అనుగుణంగా టికెట్‌ ధరలకు సంబంధించిన నిర్ణయాలు 2003 నాటి ప్రభుత్వ ఉత్తర్వులు (జీఓ) సహా నిర్దేశిత నిబంధనల ప్రకారం తీసుకుంటున్నట్లు వివరించింది. మహాలక్ష్మి పథకం రాష్ట్రవ్యాప్తంగా కొనసాగుతోందని, మహిళా ప్రయాణికులకు అసౌకర్యం కలగకుండా అవసరమైన చర్యలు తీసుకుంటున్నామని తెలిపింది.

దసరా పండుగ సందర్భంగా బస్సు సర్వీసులను తగ్గించలేదని, ప్రయాణికుల రద్దీని దృష్టిలో ఉంచుకుని అదనంగా 7,000 బస్సులను ఏర్పాటు చేసినట్లు టీజీఎస్‌ఆర్టీసీ వెల్లడించింది. ఈ నెల 10వ తేదీ నుంచి కేటాయించిన అదనపు బస్సుల్లో 97 శాతం సర్వీసులను విజయవంతంగా నడిపించినట్లు పేర్కొంది. ప్రయాణికులు సురక్షితంగా గమ్యస్థానాలకు చేరుకునేలా సంస్థ ఉన్నతాధికారులు నిరంతరం పరిస్థితిని సమీక్షిస్తున్నారని తెలిపింది. ప్రజలకు మెరుగైన, నాణ్యమైన రవాణా సేవలు అందించడమే తమ లక్ష్యమని యాజమాన్యం స్పష్టం చేసింది.