పాన్‌ ఐఐటీ సమిట్‌లో వినూత్న ఆవిష్కరణలు.. స్టార్టప్‌లకు చంద్రబాబు భరోసా

విజయవాడలో నిర్వహించిన పాన్‌ ఐఐటీ సమిట్‌ నూతన ఆవిష్కరణలు, సాంకేతిక పరిజ్ఞానంతో కూడిన అంకుర సంస్థల ప్రదర్శనలకు వేదికగా నిలిచింది. ముఖ్యమంత్రి చంద్రబాబు నాయుడు వివిధ స్టార్టప్‌ల స్టాళ్లను సందర్శించి వాటి ప్రాజెక్టులు, పరిశ్రమల ఏర్పాటుపై వివరాలు అడిగి తెలుసుకున్నారు. ఉపాధి, ఉద్యోగాల కల్పన, పెట్టుబడులు, ప్రాజెక్టుల పురోగతిపై ఆరా తీశారు. కంపెనీలకు భూ కేటాయింపులు, అనుమతుల ప్రక్రియను వేగవంతం చేయాలని ఐటీ కార్యదర్శి కాటమనేని భాస్కర్‌ను ఆదేశించారు. ప్రభుత్వం అన్ని విధాలా సహకరిస్తుందని హామీ ఇచ్చారు.

కర్నూలులో డ్రోన్‌ తయారీ యూనిట్‌ ఏర్పాటు చేస్తామని ఆక్సి ఏరోస్పేస్‌ ప్రతినిధులు సీఎంకు తెలిపారు. 50 మైక్రో మాన్యుఫ్యాక్చరింగ్‌ యూనిట్ల ద్వారా గ్రామాల్లో విడిభాగాల తయారీ చేపడతామని వివరించారు. పెట్రోల్‌ బైక్‌లను రూ.40 వేల వ్యయంతో నాలుగు గంటల్లో ఈవీలుగా మార్చే సాంకేతికతను మరో సంస్థ ప్రదర్శించగా, యూనిట్‌ ఏర్పాటుకు స్థలం కేటాయిస్తామని చంద్రబాబు హామీ ఇచ్చారు. రక్షణ డ్రోన్‌లు, శాటిలైట్‌ ఆధారిత సిటీ మ్యాపింగ్‌, ఏఐ ఫేస్‌ స్కాన్‌ ద్వారా ఆరోగ్య పరీక్షల వంటి ఆవిష్కరణలను కూడా సీఎం పరిశీలించారు. విద్యార్థుల సాంకేతిక ప్రజంటేషన్‌ను అభినందించిన చంద్రబాబు, పెట్టుబడులకు ఆంధ్రప్రదేశ్‌ అనుకూల రాష్ట్రమని పేర్కొన్నారు.