సౌత్‌ కరోలినాలో కాల్పుల కలకలం..

అమెరికాలోని సౌత్‌ కరోలినాలో కాల్పుల ఘటన కలకలం రేపింది. దుండగుడి కాల్పుల్లో ఓ పోలీస్‌ అధికారి మృతి చెందగా, మరో అధికారికి తీవ్ర గాయాలయ్యాయి. అనంతరం పోలీసులు జరిపిన ఎదురు కాల్పుల్లో అనుమానితుడు కూడా మృతి చెందాడు. నిందితుడికి గతంలో నేర చరిత్ర ఉన్నట్లు పోలీసులు తెలిపారు. మృతి చెందిన అధికారి సుమారు రెండేళ్లుగా పోలీస్‌ శాఖలో విధులు నిర్వహిస్తున్నారని, ఆయనకు భార్యతో పాటు ఇద్దరు పిల్లలు ఉన్నారని అధికారులు వెల్లడించారు.

శనివారం ఉదయం సుమారు 9:30 గంటలకు ఓ మహిళ పోలీసులకు ఫోన్‌ చేసి.. తన ఇంటి సమీపంలో ఓ వ్యక్తి ఆస్తులను ధ్వంసం చేస్తున్నాడని ఫిర్యాదు చేసింది. దీంతో ఓ పోలీస్‌ అధికారి వెంటనే అక్కడికి చేరుకోగా, అప్పటికే అనుమానితుడు అక్కడి నుంచి పరారయ్యాడు. మహిళ అతడి రూపురేఖలు, వాహనం వివరాలను అధికారులకు అందించింది. కొద్దిసేపటి తర్వాత ఆ వివరాలకు సరిపోలే వాహనం సమీపంలో ఓ వ్యక్తిని పోలీసులు గుర్తించారు. ఈ విషయాన్ని ఇతర అధికారులకు తెలియజేయడంతో అక్కడ కాల్పులు చోటుచేసుకున్నాయి. ఈ ఘటనపై దర్యాప్తు కొనసాగుతోంది.