

బ్రిటన్ యువరాజు ప్రిన్స్ విలియం, ప్రిన్సెస్ కేథరీన్ భారత్ పర్యటనలో భాగంగా ముంబైలో పర్యటిస్తున్నారు. ఈ సందర్భంగా వారు వినూత్నంగా ఈ-రిక్షాలో ప్రయాణించారు. బాంద్రా-వర్లీ సీ లింక్ సమీపంలోని ప్రాంతంలో ప్రిన్స్ విలియం స్వయంగా ఎలక్ట్రిక్ రిక్షా నడపగా, ప్రిన్సెస్ కేథరీన్ వెనుక కూర్చున్నారు. 2026 ఎర్త్షాట్ ప్రైజ్కు ఎంపికైన 15 మంది ఫైనలిస్టులను కలిసేందుకు వారు ఈ వాహనంలో వెళ్లారు. ఈ ఈ-రిక్షాను పర్యావరణహిత రవాణాను ప్రోత్సహిస్తున్న మహీంద్రా లాస్ట్ మైల్ మొబిలిటీ సంస్థ తయారు చేసింది. ఈ సంస్థ కూడా ఈ ఏడాది ఎర్త్షాట్ ప్రైజ్ ఫైనలిస్టుల్లో ఒకటిగా నిలిచింది.
వాతావరణ మార్పులు, గాలి కాలుష్యం, వ్యర్థాల నిర్వహణ వంటి పర్యావరణ సమస్యలకు పరిష్కారాలు చూపించే వినూత్న ఆలోచనలను ఎర్త్షాట్ ప్రైజ్ ప్రోత్సహిస్తుంది. ఈ అవార్డుకు సంబంధించి ప్రపంచంలోనే అత్యధిక విజేతలు, ఫైనలిస్టులు భారత్ నుంచే ఉన్నారు. ఆరో ఎర్త్షాట్ ప్రైజ్ అవార్డుల వేడుకకు 2026 నవంబర్ 17న ముంబై వేదికగా నిలుస్తోంది. ఫైనలిస్టులతో భేటీ అనంతరం ప్రిన్స్ విలియం, ప్రిన్సెస్ కేథరీన్ లోయర్ పరేల్లోని మ్యూజియం ఆఫ్ సొల్యూషన్స్లో నిర్వహించిన చిల్డ్రన్ ఎర్త్షాట్ కార్యక్రమంలోనూ పాల్గొన్నారు. పర్యావరణ సమస్యలకు పరిష్కారాలు రూపొందిస్తున్న చిన్నారులను ఈ కార్యక్రమం గుర్తించి ప్రోత్సహిస్తుంది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!