

భారతీయ ఇతిహాసాల్లో అత్యంత ప్రాచుర్యం పొందిన రామాయణ గాథ తరతరాలుగా ప్రజలను ఆకట్టుకుంటోంది. తాజాగా రామాయణ చిత్రం ప్రపంచవ్యాప్తంగా ప్రేక్షకుల దృష్టిని ఆకర్షిస్తున్న నేపథ్యంలో, ఈ ఇతిహాసంతో ముడిపడిన ప్రముఖ క్షేత్రాలు, పౌరాణిక ప్రదేశాలపై ఆసక్తి పెరుగుతోంది. భారత్తో పాటు నేపాల్, శ్రీలంకల్లోనూ రామాయణంలోని ముఖ్య ఘట్టాలకు సంబంధించిన ప్రాంతాలు ఉన్నాయని సంప్రదాయ కథనాలు చెబుతున్నాయి. శ్రీరాముడి జన్మస్థలమైన అయోధ్య ఉత్తర్ప్రదేశ్లో సరయూ నది తీరాన ఉంది. ప్రాచీన కోసల రాజ్యానికి ఇది రాజధానిగా ఉండేది. ఇక్కడి రామజన్మభూమి ఆలయం, హనుమాన్ గఢీ, కనక్ భవన్ ప్రముఖ పుణ్యక్షేత్రాలుగా ప్రసిద్ధి చెందాయి. ఇక జనక మహారాజు పాలించిన మిథిల ప్రాంతం సీతాదేవి జన్మస్థలంగా పురాణాల్లో ప్రస్తావించబడింది. ప్రస్తుత నేపాల్లోని జనక్పుర్ను మిథిలతో అనుసంధానిస్తారు. ఇక్కడ నిర్మించిన ప్రసిద్ధ జానకీ మందిరం భక్తులను విశేషంగా ఆకర్షిస్తోంది.
రాముడు, సీత, లక్ష్మణులు వనవాస సమయంలో ఎక్కువ కాలం గడిపిన ప్రాంతంగా చిత్రకూట్కు ప్రత్యేక గుర్తింపు ఉంది. ఉత్తర్ప్రదేశ్, మధ్యప్రదేశ్ ప్రాంతాల మధ్య విస్తరించిన ఈ క్షేత్రంలో రామఘాట్, కామద్గిరి కొండలు, భరత్ మిలాప్ ఆలయం ప్రధాన సందర్శనీయ ప్రదేశాలు. భరతుడు రాముడిని అయోధ్యకు తిరిగి రావాలని వేడుకున్నది కూడా ఇక్కడేనని పురాణ గాథలు చెబుతున్నాయి. మహారాష్ట్రలోని నాసిక్ వద్ద గోదావరి నది తీరాన ఉన్న పంచవటి కూడా రామాయణంతో ముడిపడిన ప్రముఖ ప్రాంతం. వనవాస సమయంలో రాముడు, సీత, లక్ష్మణులు ఇక్కడ నివసించారని భక్తులు విశ్వసిస్తారు. శూర్పణఖ ముక్కును లక్ష్మణుడు ఖండించిన ఘట్టం కూడా ఈ ప్రాంతంతో ముడిపడి ఉంది. ఇక్కడి కాలారామ్ మందిరం, సీతా గుహలను సందర్శించేందుకు యాత్రికులు ఆసక్తి చూపుతుంటారు. ఇక కర్ణాటకలోని హంపి ప్రాంతాన్ని రామాయణంలోని వానర రాజ్యమైన కిష్కిందతో అనుసంధానిస్తారు. సీతమ్మ జాడ కోసం వెతుకుతున్న సమయంలో రామలక్ష్మణులు హనుమంతుడిని తొలిసారిగా కలిసింది ఈ ప్రాంతంలోనేనని సంప్రదాయ కథనాలు పేర్కొంటున్నాయి. హనుమంతుడి జన్మస్థలంగా భావించే అంజనాద్రి కొండలు ఇక్కడి ప్రముఖ ఆధ్యాత్మిక కేంద్రాల్లో ఒకటి.
తమిళనాడులోని పంబన్ దీవిలో ఉన్న రామేశ్వరం కూడా రామాయణంతో విడదీయలేని అనుబంధాన్ని కలిగి ఉంది. పురాణ గాథ ప్రకారం, సీతమ్మను రక్షించేందుకు లంకకు వెళ్లే క్రమంలో రాముడు వానర సైన్యంతో ఈ సముద్ర తీరానికి చేరుకున్నారు. ఇక్కడి నుంచే సముద్రంపై రామసేతు నిర్మాణం చేపట్టినట్లు రామాయణం చెబుతోంది. రామనాథస్వామి ఆలయం ఇక్కడి ప్రధాన ఆకర్షణ. ఇక రావణాసురుడి రాజ్యంగా రామాయణంలో పేర్కొన్న లంకను ప్రస్తుత శ్రీలంకతో సంప్రదాయంగా అనుసంధానిస్తారు. శ్రీలంకలోని సీతా ఎలియాలో ఉన్న సీతా అమ్మన్ ఆలయం, గురులుపొత సమీపంలోని సీతా కొటువ, ఎల్లా సమీపంలోని రావణ గుహలు రామాయణంతో ముడిపడిన ప్రముఖ ప్రదేశాలుగా గుర్తింపు పొందాయి. నువర ఎలియా కొండ ప్రాంతాలతో పాటు మరికొన్ని ప్రాంతాలకూ స్థానికంగా రామాయణ గాథలతో సంబంధం ఉందని విశ్వసిస్తారు. ఇలా భారత్, నేపాల్, శ్రీలంకల్లో విస్తరించిన ఈ ప్రాంతాలు రామాయణ ఇతిహాసంలోని ఘట్టాలను గుర్తుచేస్తూ భక్తులు, పర్యాటకులను ఆకర్షిస్తున్నాయి.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!