ఉపాధి లక్ష్యంగా ఉన్నత విద్య ఉండాలి: మంత్రి శ్రీధర్ బాబు

తెలంగాణలో ఉన్నత విద్యను ఉపాధి, నైపుణ్యాలతో అనుసంధానం చేయాల్సిన అవసరం ఉందని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు అన్నారు. కుకట్‌పల్లిలోని జేఎన్‌టీయూహెచ్‌లో తెలంగాణ ఉన్నత విద్యామండలి ఆధ్వర్యంలో నిర్వహించిన ‘రీచ్–2026’ (రిసెర్చ్, ఎడ్యుకేషన్ అండ్ అడ్వాన్స్‌మెంట్) సదస్సులో ఆయన ముఖ్యఅతిథిగా పాల్గొని ప్రసంగించారు. తరగతి గదిలో అందించే విద్యకు, పరిశ్రమల అవసరాలకు మధ్య ఉన్న అంతరాన్ని తగ్గించాలని సూచించారు. విద్యార్థులు కోర్సు పూర్తయ్యే సమయానికే ఉద్యోగానికి అవసరమైన ఆచరణాత్మక నైపుణ్యాలను సాధించేలా విద్యా విధానాన్ని రూపొందించాల్సిన అవసరం ఉందన్నారు.

విద్యార్థులు, పరిశోధకుల ఆలోచనలను స్టార్టప్‌లు, నూతన ఉత్పత్తులుగా మలిచేందుకు ప్రతి విశ్వవిద్యాలయంలో ఇంక్యుబేషన్ సెంటర్లను ఏర్పాటు చేయాలని శ్రీధర్ బాబు సూచించారు. కరికులమ్ రూపకల్పన, ల్యాబ్‌లు, ఇంటర్న్‌షిప్‌లు, లైవ్ ప్రాజెక్ట్‌లు, పరిశోధనల్లో పరిశ్రమల భాగస్వామ్యం పెరగాలని కోరారు. “ఒక చేతిలో డిగ్రీ.. మరో చేతిలో నైపుణ్యం” అనే విధానం కొత్త ప్రమాణంగా మారాలని పేర్కొన్నారు. ఉన్నత విద్య, పరిశోధన, ఆవిష్కరణలను బలోపేతం చేయడంతో పాటు విశ్వవిద్యాలయాలు, పరిశ్రమల మధ్య మరింత సమన్వయం పెంచడంపై రీచ్–2026లో చర్చలు జరిగాయి.