మళ్లీ రంగంలోకి ఎక్స్ ట్రాక్షన్ యాక్షన్ తుఫాన్!

ప్రపంచవ్యాప్తంగా యాక్షన్ సినిమాల అభిమానులను అలరించిన ‘ఎక్స్ ట్రాక్షన్’ సిరీస్ మరోసారి ప్రేక్షకుల ముందుకు రానుంది. నెట్‌ఫ్లిక్స్ వేదికగా సంచలన విజయాన్ని అందుకున్న ఈ చిత్రానికి ఇప్పుడు మూడో భాగం అధికారికంగా ఖరారైంది. ప్రధాన పాత్రలో క్రిస్ హేమ్స్‌వర్త్ మరోసారి కనిపించనున్నట్లు ప్రకటించడంతో అభిమానుల్లో ఆనందం వ్యక్తమవుతోంది. తొలి రెండు భాగాల్లో ఆకట్టుకున్న నటుడు ఐడ్రిస్ ఎల్బా, దర్శకుడు సామ్ హర్‌గ్రేవ్ కూడా ఈ ప్రాజెక్టులో కొనసాగనుండటం విశేషంగా మారింది. ఈ ప్రకటనతో ప్రపంచవ్యాప్తంగా యాక్షన్ అభిమానుల దృష్టి మరోసారి ఈ సిరీస్‌పైనే నిలిచింది.

కోవిడ్ సమయంలో విడుదలైన తొలి చిత్రం అంచనాలకు మించి ఆదరణ పొందగా, రెండో భాగం కూడా అదే స్థాయిలో విజయాన్ని అందుకుంది. ఈ నేపథ్యంలో మూడో భాగంపై భారీ అంచనాలు ఏర్పడ్డాయి. క్రిస్ హేమ్స్‌వర్త్, ఐడ్రిస్ ఎల్బా, సామ్ హర్‌గ్రేవ్ కలిసి ఉన్న చిత్రాన్ని విడుదల చేస్తూ నెట్‌ఫ్లిక్స్ అధికారికంగా ఈ ప్రాజెక్టును ప్రకటించింది. గత చిత్రాల కంటే మరింత ఉత్కంఠభరితమైన కథ, భారీ యాక్షన్ సన్నివేశాలు, అత్యాధునిక చిత్రీకరణతో ప్రేక్షకులను అలరించేలా సన్నాహాలు జరుగుతున్నట్లు సమాచారం. అయితే విడుదల తేదీపై మాత్రం ఇంకా అధికారిక ప్రకటన వెలువడాల్సి ఉంది.