బోల్డ్ కథతో మరోసారి సంచలనానికి సిద్ధమవుతున్న ఏక్తా కపూర్‌

బాలీవుడ్‌లో సంచలనం సృష్టించిన ‘ది డర్టీ పిక్చర్‌’ చిత్రానికి సీక్వెల్‌ రాబోతోంది. విద్యాబాలన్‌ ప్రధాన పాత్రలో నటించిన ఈ సినిమా 2011లో విడుదలై బాక్సాఫీస్‌ వద్ద విజయాన్ని అందుకుంది. కీర్తి, గ్లామర్‌, సమాజం నుంచి ఎదురయ్యే విమర్శల మధ్య ఓ మహిళ ప్రయాణాన్ని ఈ చిత్రం ప్రభావవంతంగా ఆవిష్కరించింది. దాదాపు 15 ఏళ్ల తర్వాత ‘ది డర్టీ పిక్చర్‌ 2’ను తెరకెక్కించేందుకు ప్రణాళికలు సిద్ధం చేస్తున్నట్లు నిర్మాత ఏక్తా కపూర్‌ వెల్లడించారు.

ఇటీవల ఓ పాడ్‌కాస్ట్‌లో మాట్లాడిన ఏక్తా కపూర్‌.. ఈసారి సమాజానికి చెప్పాల్సిన మరో బలమైన కథను ఎంచుకున్నట్లు తెలిపారు. మొదటి భాగం దివంగత నటి సిల్క్‌ స్మిత జీవితం నుంచి ప్రేరణ పొందిందని గుర్తుచేశారు. తన లైంగికతను ధైర్యంగా వ్యక్తపరిచిన సిల్క్‌ స్మితను తాను బాధితురాలిగా మాత్రమే చూడలేదని పేర్కొన్నారు. కాలంతో పాటు మహిళల లైంగికతపై సమాజ దృక్పథం మారిందని, అది వ్యక్తిగత ఎంపికకు సంబంధించిన అంశమని అభిప్రాయపడ్డారు. సీక్వెల్‌ మరో ప్రముఖ నిజజీవిత వ్యక్తి నుంచి ప్రేరణ పొందుతుందని సూచించినప్పటికీ, నటీనటులు, దర్శకుడి వివరాలను వెల్లడించలేదు. ఆధునిక సమాజంలో మహిళల ఎంపికలు, స్వేచ్ఛకు సంబంధించిన కొత్త కోణాన్ని ఈ చిత్రం చూపించనున్నట్లు తెలుస్తోంది.