మాధవ్‌ ‘మారెమ్మ’ ట్రైలర్‌ విడుదల

‘ఇరుముడి’ విజయంతో జోష్‌లో ఉన్న రవితేజ కుటుంబం నుంచి మరో హీరో టాలీవుడ్‌లోకి అడుగుపెడుతున్నారు. రవితేజ తమ్ముడు రఘు కుమారుడు మాధవ్‌ ప్రధాన పాత్రలో నటించిన ‘మారెమ్మ’ విడుదలకు సిద్ధమైంది. మంచాల నాగరాజు దర్శకత్వంలో తెరకెక్కిన ఈ చిత్రం ఈ నెల 10న థియేటర్లలోకి రానుంది. మాధవ్‌ గతంలో ‘లవ్‌ యూ ఇడియట్‌’ చిత్రంతో హీరోగా పరిచయమైనప్పటికీ, ఆ సినిమా పెద్దగా గుర్తింపు తెచ్చుకోలేదు. దీంతో ‘మారెమ్మ’తోనైనా తనకంటూ ప్రత్యేక గుర్తింపు సంపాదించుకోవాలని మాధవ్‌ ఆశిస్తున్నారు.

తాజాగా ‘మారెమ్మ’ ట్రైలర్‌ను చిత్రబృందం విడుదల చేసింది. తెలంగాణలోని ఓ గ్రామీణ నేపథ్యాన్ని ప్రధానంగా చేసుకున్న ఈ కథలో మారెమ్మ అనే గ్రామదేవత, ఆమె కోసం పెంచే ఓ దున్నపోతు, దాన్ని కాపాడే కాపరి, గ్రామంలో చోటుచేసుకునే కొన్ని అరిష్టాల చుట్టూ కథ సాగుతున్నట్లు ట్రైలర్‌ ద్వారా తెలుస్తోంది. మాధవ్‌కు జోడీగా దీపా బాలు హీరోయిన్‌గా నటించారు. గ్రామీణ వాతావరణం, ఆసక్తికరమైన కథాంశంతో ఉన్న ట్రైలర్‌ సినిమాపై అంచనాలను పెంచుతోంది. ఈ సినిమాతో మాధవ్‌ హీరోగా మంచి విజయాన్ని అందుకుంటాడా అనేది చూడాలి.