

ఆంధ్రప్రదేశ్లో ఎంపీపీ ఎన్నికలు రాజకీయంగా ఉత్కంఠ రేపుతున్నాయి. పలు మండలాల్లో కూటమి, వైఎస్సార్సీపీ బలాబలాలు దాదాపు సమానంగా ఉండటంతో మండల పరిషత్ అధ్యక్ష పదవులు ఎవరికి దక్కుతాయనే దానిపై సందిగ్ధత నెలకొంది. ఎలాగైనా ఎంపీపీ స్థానాలను కైవసం చేసుకోవాలని రెండు పక్షాలు వ్యూహాలు రచిస్తున్నాయి. ముఖ్యంగా స్వతంత్రులుగా గెలిచిన ఎంపీటీసీల మద్దతు కూడగట్టేందుకు ప్రయత్నాలు ముమ్మరం చేశాయి. ఉమ్మడి కర్నూలు జిల్లాలోని పాములపాడు మండలంలో తెదేపా, వైఎస్సార్సీపీ చెరో ఐదు స్థానాల్లో గెలుపొందగా.. ఒక స్థానంలో స్వతంత్ర అభ్యర్థి విజయం సాధించారు. కోడుమూరులో వైఎస్సార్సీపీ 10, తెదేపా 9 స్థానాలు గెలుచుకోగా.. సీపీఎం, స్వతంత్ర అభ్యర్థి ఒక్కో స్థానంలో విజయం సాధించారు. దీంతో ఈ రెండు చోట్ల స్వతంత్రుల మద్దతు కీలకంగా మారింది.
ఇతర జిల్లాల్లోనూ ఇదే తరహా పరిస్థితులు నెలకొన్నాయి. విజయనగరం జిల్లా గుర్ల మండలంలో మొత్తం 18 ఎంపీటీసీ స్థానాలకు కూటమి, వైఎస్సార్సీపీ చెరో తొమ్మిది స్థానాలు గెలుచుకున్నాయి. దీంతో ఎంపీపీ ఎన్నికలో లాటరీ విధానం అనుసరించే అవకాశముంది. అల్లూరి సీతారామరాజు జిల్లా పాడేరులో వైఎస్సార్సీపీ 9, కూటమి 8 స్థానాల్లో గెలుపొందగా.. ఒక సభ్యుడు గైర్హాజరు కావడంతో ఉత్కంఠ కొనసాగుతోంది. నెల్లూరు జిల్లా సైదాపురంలో తెదేపా, వైఎస్సార్సీపీ సమాన స్థానాలు సాధించడంతో టాస్ ద్వారా ఎంపీపీని నిర్ణయించే అవకాశం ఉంది. వింజమూరులో ఎంపీటీసీల మద్దతు వైఎస్సార్సీపీకి అనుకూలంగా ఉండటంతో ఆ పార్టీకి అవకాశం కనిపిస్తోంది. తిరుపతి జిల్లా వెంకటగిరిలోనూ తెదేపా, వైఎస్సార్సీపీ చెరో నాలుగు స్థానాలు గెలుచుకున్నాయి. ఇక్కడ లాటరీ ద్వారా ఎంపీపీని ఎంపిక చేసే అవకాశం ఉండగా.. తెదేపా అభ్యర్థిగా రాజేశ్వరి పేరును ప్రకటించింది. వైఎస్సార్సీపీ మాత్రం ఇంకా అభ్యర్థిని ఖరారు చేయలేదు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!