దమ్ముంటే ఆ నాలుగు రాష్ట్రాల్లో బ్యాలెట్‌తో మళ్లీ ఎన్నికలకు రండి: బండి సంజయ్

ఎలక్ట్రానిక్ ఓటింగ్ మెషీన్లపై కాంగ్రెస్ పార్టీ చేస్తున్న విమర్శలపై కేంద్ర హోంశాఖ సహాయ మంత్రి బండి సంజయ్ కుమార్ తీవ్రంగా స్పందించారు. ఈవీఎంలపై నిజంగానే కాంగ్రెస్‌కు అనుమానాలు ఉంటే.. తెలంగాణ, కర్ణాటక, హిమాచల్ ప్రదేశ్, కేరళ రాష్ట్రాల్లోని కాంగ్రెస్ ప్రభుత్వాలు రాజీనామా చేసి, ప్రభుత్వాలను రద్దు చేసి బ్యాలెట్ పేపర్లతో మళ్లీ ఎన్నికలకు రావాలని సవాల్ విసిరారు. హైదరాబాద్‌లో మీడియాతో మాట్లాడుతూ.. ఈ సవాల్‌ను స్వీకరించేందుకు కాంగ్రెస్ సిద్ధంగా ఉండాలని అన్నారు. సీఈసీ జ్ఞానేశ్ కుమార్‌ను బీజేపీతో ముడిపెట్టడం సరికాదని, ఎన్నికల సంఘం స్వతంత్ర ప్రతిపత్తి కలిగిన రాజ్యాంగ సంస్థ అని పేర్కొన్నారు. ఈవీఎంలు, ఓటర్ల జాబితా ప్రత్యేక సవరణ (SIR) అంశాలపై ప్రస్తుతం కొనసాగుతున్న రాజకీయ చర్చల నేపథ్యంలో ఆయన ఈ వ్యాఖ్యలు చేశారు.

దిల్‌సుఖ్‌నగర్‌లోని సంతోషిమాత ఆలయంలో జరిగిన ఘటనను కూడా బండి సంజయ్ ఖండించారు. ఆలయంలోకి ప్రవేశించిన ఓ వ్యక్తి పూజారిపై దాడికి యత్నించడంతో పాటు అమ్మవారి విగ్రహంపై కర్రలతో దాడి చేసినట్లు పోలీసులు కేసు నమోదు చేసి దర్యాప్తు చేస్తున్నారు. భక్తులు అతడిని పట్టుకుని పోలీసులకు అప్పగించినట్లు సమాచారం. ఆలయాల భద్రతపై ప్రభుత్వం మరింత కఠిన చర్యలు తీసుకోవాలని బండి సంజయ్ డిమాండ్ చేశారు. ఇలాంటి ఘటనలపై సమగ్ర దర్యాప్తు జరిపి బాధ్యులపై చట్టపరమైన చర్యలు తీసుకోవాలని కోరారు. కేంద్ర హోంమంత్రి అమిత్ షా తెలంగాణ పర్యటన అనివార్య కారణాల వల్ల వాయిదా పడిందని కూడా తెలిపారు.