

తెలంగాణ కాంగ్రెస్లో మరోసారి ఎమ్మెల్యేల వ్యాఖ్యలు రాజకీయంగా చర్చనీయాంశంగా మారాయి. మునుగోడు ఎమ్మెల్యే కోమటిరెడ్డి రాజగోపాల్ రెడ్డి, జడ్చర్ల ఎమ్మెల్యే అనిరుధ్ రెడ్డి ఇటీవల చేసిన వ్యాఖ్యలపై టీపీసీసీ అధ్యక్షుడు మహేష్ కుమార్ గౌడ్ స్పందించారు. గురువారం గాంధీ భవన్లో మీడియాతో మాట్లాడిన ఆయన.. పార్టీలో క్రమశిక్షణ విషయంలో అందరికీ ఒకే విధమైన నిబంధనలు వర్తిస్తాయని స్పష్టం చేశారు. ఎవరైనా పార్టీ విధానాలకు, నిర్ణయాలకు వ్యతిరేకంగా బహిరంగంగా మాట్లాడితే సహించే ప్రసక్తి లేదని అన్నారు. ఇద్దరు ఎమ్మెల్యేలు ఏ సందర్భంలో ఎలాంటి వ్యాఖ్యలు చేశారనే అంశాన్ని పార్టీ హైకమాండ్ పరిశీలిస్తోందని, సరైన సమయంలో వారిని పిలిచి మాట్లాడుతామని వెల్లడించారు.
ఇటీవల కోమటిరెడ్డి రాజగోపాల్ రెడ్డి నియోజకవర్గాలకు అభివృద్ధి నిధుల కేటాయింపుపై సీఎం రేవంత్ రెడ్డిని విమర్శించారు. కొడంగల్, మధిర వంటి నియోజకవర్గాలకే అధిక ప్రాధాన్యం ఇస్తున్నారని ఆరోపించారు. ముఖ్యమంత్రి తనను బెదిరిస్తున్నారని కూడా వ్యాఖ్యానించారు. మరోవైపు, జడ్చర్ల ఎమ్మెల్యే అనిరుధ్ రెడ్డి అభివృద్ధి పనులకు సంబంధించిన బిల్లుల చెల్లింపులు పెండింగ్లో ఉండటంతో పాటు అధికారులు కమీషన్లు అడుగుతున్నారని ఆరోపించారు. ఈ వ్యాఖ్యలు పార్టీకి ఇబ్బందికరంగా మారినట్లు తెలుస్తోంది. ఇద్దరు నేతలకు షోకాజ్ నోటీసులు జారీ చేసే అవకాశం ఉందనే చర్చ కూడా రాజకీయ వర్గాల్లో సాగుతోంది. అయితే ప్రతి అంశాన్ని పరిశీలించిన తర్వాతే నిర్ణయం తీసుకుంటామని మహేష్ కుమార్ గౌడ్ సంకేతాలు ఇచ్చారు. అంతర్గత విభేదాలను పరిష్కరించుకుంటూ పార్టీ ఐక్యత, క్రమశిక్షణను కాపాడటం కాంగ్రెస్ నాయకత్వానికి ఇప్పుడు కీలకంగా మారింది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!