తిలక్‌ వర్మ టాటూల వెనుక ఆసక్తికర కథ..

టీమిండియా యువ క్రికెటర్‌ తిలక్‌ వర్మకు టాటూలంటే ఎంతో ఇష్టం. మైదానంలో తన ఆటతో అభిమానులను ఆకట్టుకుంటున్న ఈ యంగ్‌ బ్యాటర్‌.. శరీరంపై వేయించుకున్న టాటూలతోనూ ప్రత్యేకంగా నిలుస్తున్నారు. అయితే తిలక్‌ వేసుకున్న ప్రతి టాటూ వెనుక ఓ ప్రత్యేకమైన భావం ఉంది. పరమశివుడికి వీరభక్తుడైన తిలక్‌.. తన కుడి చేతికి పూర్తిగా ఆధ్యాత్మిక థీమ్‌తో కూడిన స్లీవ్‌ టాటూ వేయించుకున్నారు. బైసెప్‌పై శివుడి రూపం, ముంజేతిపై వినాయకుడి చిత్రం, మణికట్టు సమీపంలో శివుడి పూజకు సంబంధించిన పుష్పాల డిజైన్‌ ఇందులో ఉన్నాయి. ఛాతీపై ‘ఓం నమః శివాయ’ అని, అదే చేతిపై ‘అన్‌వేవరింగ్‌ సెల్ఫ్‌ ట్రస్ట్‌’ అనే పదాలను టాటూలుగా వేయించుకున్నారు. ఇవి ఆయన భక్తితో పాటు ఆత్మవిశ్వాసాన్ని ప్రతిబింబిస్తున్నాయి.

తన కుటుంబంపై ఉన్న ప్రేమను కూడా తిలక్‌ వర్మ టాటూల రూపంలో చూపించారు. తల్లిదండ్రులపై తనకున్న అభిమానానికి గుర్తుగా వారి పోర్ట్రెయిట్లను పక్కటెముకల భాగంలో టాటూలుగా వేయించుకున్నారు. తనకు ఎంతో ఇష్టమైన పెంపుడు కుక్క ‘ట్రిగర్‌’ చిత్రాన్ని కూడా కాలుపై పచ్చబొట్టుగా వేయించుకున్నారు. ముంబయిలోని ఏలియన్స్‌ టాటూ స్టూడియోలో ఈ టాటూలను వేయించుకున్నట్లు సమాచారం. ఆధ్యాత్మికత, ఆత్మవిశ్వాసం, కుటుంబంపై ప్రేమ, పెంపుడు జంతువుపై అనుబంధాన్ని ప్రతిబింబించే తిలక్‌ టాటూలు ప్రస్తుతం యువతను విశేషంగా ఆకట్టుకుంటున్నాయి.