

దేశంలో పెరుగుతున్న వాయు కాలుష్యానికి రవాణా రంగం కూడా ప్రధాన కారణమని కేంద్ర రోడ్డు రవాణా, జాతీయ రహదారుల శాఖ మంత్రి నితిన్ గడ్కరీ అంగీకరించారు. ఢిల్లీలో జరిగిన 14వ సీఐఐ బయోఎనర్జీ సదస్సులో మాట్లాడుతూ, దేశంలోని వాయు కాలుష్యంలో 40 శాతానికి తానే బాధ్యత వహిస్తున్నానని పేర్కొన్నారు. రహదారుల అభివృద్ధి, వాహనాల సంఖ్య పెరగడం, పెట్రోల్, డీజిల్ వినియోగం వల్ల పర్యావరణంపై ఒత్తిడి పెరుగుతోందని వివరించారు. రవాణా రంగానికి సంబంధించిన విధాన నిర్ణయాల్లో భాగమైనందున పర్యావరణ ప్రభావంపై తనకూ బాధ్యత ఉందని అన్నారు.
పెట్రోల్, డీజిల్పై ఆధారపడటాన్ని తగ్గించి ఇథనాల్, మిథనాల్, బయోడీజిల్, హైడ్రోజన్, విద్యుత్ ఆధారిత రవాణా వంటి ప్రత్యామ్నాయాలను ప్రోత్సహించాలని గడ్కరీ సూచించారు. వ్యవసాయ వ్యర్థాలు, పశువుల పేడ, సేంద్రియ వ్యర్థాల నుంచి బయోఎనర్జీ, కంప్రెస్డ్ బయోగ్యాస్ (సీబీజీ) తయారీని విస్తరించాలని అన్నారు. పంట వ్యర్థాలను తగలబెట్టకుండా ఇంధన తయారీకి ఉపయోగిస్తే కాలుష్యం తగ్గడంతోపాటు రైతులకు అదనపు ఆదాయం లభిస్తుందని వివరించారు. తన మంత్రిత్వ శాఖ బాధ్యతలు చేపట్టిన సమయంలో రూ.14 లక్షల కోట్లుగా ఉన్న దేశ ఆటోమొబైల్ పరిశ్రమ విలువ ప్రస్తుతం రూ.22 లక్షల కోట్లకు చేరిందని పేర్కొంటూ, ఆర్థిక అభివృద్ధితో పాటు పర్యావరణ పరిరక్షణకూ ప్రాధాన్యం ఇవ్వాలని చెప్పారు.


కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!