అమరావతి ఓఆర్‌ఆర్‌లో 17 ఇంటర్‌ఛేంజ్‌లు..

అమరావతి అవుటర్‌ రింగ్‌ రోడ్‌ (ఓఆర్‌ఆర్‌)లో మొత్తం 17 ఇంటర్‌ఛేంజ్‌లు నిర్మించనున్నారు. 189.93 కి.మీ. పొడవున ఆరు వరుసలతో నిర్మించే ఈ యాక్సెస్‌ కంట్రోల్‌ ఓఆర్‌ఆర్‌లో వాహనాలు నిర్ణీత ఇంటర్‌ఛేంజ్‌ల వద్దే ప్రవేశించి, బయటకు వెళ్లేలా ఏర్పాట్లు చేయనున్నారు. ఆరు జాతీయ రహదారులను ఓఆర్‌ఆర్‌ క్రాస్‌ చేయనున్న నేపథ్యంలో 8 చోట్ల డబుల్‌ ట్రంపెట్‌ ఇంటర్‌ఛేంజ్‌లు ఏర్పాటు చేయనున్నారు. రాష్ట్ర, జిల్లా రహదారులు కలిసే ప్రాంతాల్లో 8 రోటరీ ఇంటర్‌ఛేంజ్‌లు, మరోచోట సింగిల్‌ ట్రంపెట్‌ ఇంటర్‌ఛేంజ్‌ నిర్మించనున్నారు. కంచికచర్ల, దుగ్గిరాలపాడు, మైలవరం, ఆగిరిపల్లి, పొట్టిపాడు, చలివేంద్రపాలెం, నారాకోడూరు, పొత్తూరు-లింగాయపాలెం తదితర ప్రాంతాల్లో ఇవి ఏర్పాటు కానున్నాయి.

తొలుత ఓఆర్‌ఆర్‌లో 19 ఇంటర్‌ఛేంజ్‌లను ప్రతిపాదించారు. అయితే ప్రాజెక్టు వ్యయం రూ.38,450 కోట్లుగా ఉండటంతో ఖర్చు తగ్గించే చర్యల్లో భాగంగా రెండు ఇంటర్‌ఛేంజ్‌లను తొలగించారు. ఓఆర్‌ఆర్‌ బయటివైపు సర్వీస్‌ రోడ్ల ప్రతిపాదనను కూడా పక్కన పెట్టారు. అలాగే తెనాలి సమీపం నుంచి చెన్నై-కోల్‌కతా హైవేలోని కాజ వరకు ప్రతిపాదించిన 17.5 కి.మీ. ఆరు వరుసల అనుసంధాన రహదారిని కూడా తొలగించారు. దీంతో ఆ రహదారి ప్రారంభం, ముగింపు ప్రాంతాల్లో ప్రతిపాదించిన రెండు ఇంటర్‌ఛేంజ్‌లు అవసరం లేకుండా పోయాయి. తాజా మార్పులతో ప్రాజెక్టు అంచనా వ్యయం రూ.30,491 కోట్లకు తగ్గింది. ప్రధాన జాతీయ, రాష్ట్ర, జిల్లా రహదారులకు ఓఆర్‌ఆర్‌ ద్వారా నియంత్రిత రాకపోకలు కల్పించడమే ఈ ఇంటర్‌ఛేంజ్‌ల ప్రధాన ఉద్దేశం.