లంచాల ఆరోపణలు.. తమిళనాడులో ఐదుగురు పోలీసులపై కఠిన చర్యలు

ప్రజలకు రక్షణ కల్పించాల్సిన పోలీసులే అవినీతికి పాల్పడితే కఠిన చర్యలు తప్పవని తమిళనాడులో ప్రభుత్వం తీసుకున్న తాజా నిర్ణయాలు స్పష్టం చేస్తున్నాయి. తిరునెల్వేలి, చెన్నై పరిసర ప్రాంతాల్లో వేర్వేరు ఘటనలకు సంబంధించి లంచం డిమాండ్ చేయడం, డిజిటల్ చెల్లింపుల ద్వారా నగదు వసూలు చేయడం వంటి ఆరోపణలపై ఐదుగురు పోలీసులపై శాఖాపరమైన చర్యలు తీసుకున్నారు. వాహన తనిఖీల సమయంలో రూ.1,000 లంచం డిమాండ్ చేసి, నగదు లేకపోవడంతో జీపే ద్వారా డబ్బులు బదిలీ చేయించుకున్నట్లు ఆరోపణలు ఎదుర్కొన్న హెడ్ కానిస్టేబుల్ సోర్ణరాజ్‌ను సస్పెండ్ చేశారు.

దొంగిలించబడిన ద్విచక్ర వాహనాన్ని బాధితుడికి అప్పగించేందుకు రూ.10,000 జీ-పే ద్వారా వసూలు చేశారన్న ఆరోపణలపై ఎస్‌ఐ శివరాజ్, కానిస్టేబుల్ వివేక్‌లను కూడా సస్పెండ్ చేశారు. మరో కేసులో లంచం డిమాండ్ చేసిన ఎస్‌ఐపై విజిలెన్స్ విచారణ అనంతరం చర్యలు తీసుకోగా, గతంలో లంచం తీసుకున్నట్లు తేలిన ఎస్‌ఐ మరీశ్వరన్‌ను సర్వీసు నుంచి తొలగించారు. పోలీసు శాఖలో అవినీతిని ఉపేక్షించబోమనే సంకేతంగా ఈ చర్యలు నిలుస్తున్నాయి.