పేదలకు పక్కా ఇళ్ల నిర్మాణానికి శ్రీకారం.. బుర్రిపాలెంలో సీఎం చంద్రబాబు కీలక ప్రకటనలు

తెనాలి బుర్రిపాలెంలో PMAY-గ్రామీణ్ 2.0 కింద మూడు లక్షల ఇళ్ల నిర్మాణానికి ముఖ్యమంత్రి చంద్రబాబు నాయుడు శంకుస్థాపన చేశారు. ఈ సందర్భంగా ఆయన మాట్లాడుతూ సాధారణ కోటా కింద రాష్ట్రానికి పరిమిత సంఖ్యలో ఇళ్లు మాత్రమే మంజూరయ్యాయని, అయితే రాష్ట్ర ప్రభుత్వం ప్రత్యేకంగా విజ్ఞప్తి చేయడంతో కేంద్రం మూడు లక్షల ఇళ్లను మంజూరు చేసిందని తెలిపారు. ప్రస్తుతం మంజూరైన ఇళ్ల నిర్మాణం పూర్తయిన తర్వాత మరో మూడు లక్షల ఇళ్లను, ఆ తర్వాత వచ్చే ఏడాది మరో మూడు లక్షల ఇళ్లను మంజూరు చేసేందుకు కేంద్ర మంత్రి శివరాజ్ సింగ్ చౌహాన్ అంగీకరించారని చెప్పారు. 2029 నాటికి రాష్ట్రంలోని ఇళ్లులేని పేద కుటుంబాలందరికీ పక్కా ఇళ్లు నిర్మించాలనే లక్ష్యంతో ప్రభుత్వం పనిచేస్తోందన్నారు.

సొంత ఇల్లు ఉండటం వల్ల పేదల జీవన ప్రమాణాలతో పాటు ఆత్మగౌరవం కూడా పెరుగుతుందని చంద్రబాబు అన్నారు. పేదలకు ఇళ్లు అందించాలనే ఆలోచనకు ఎన్టీఆర్ శ్రీకారం చుట్టారని గుర్తుచేశారు. కూటమి ప్రభుత్వం సంక్షేమం, అభివృద్ధిని ప్రతి వర్గానికి, ప్రతి ప్రాంతానికి అందించడమే లక్ష్యంగా పనిచేస్తోందన్నారు. గ్రామీణ ప్రాంతాల్లో అభివృద్ధి పనులకు ఇప్పటికే భారీగా నిధులు కేటాయించామని, రాబోయే ఐదేళ్లలో మరింత పెద్ద ఎత్తున గ్రామీణ అభివృద్ధి చేపడతామని తెలిపారు. బుర్రిపాలెంలో పైలట్ ప్రాజెక్టుగా 3D కాంక్రీట్ టెక్నాలజీతో ఇళ్ల నిర్మాణం చేపట్టనున్నట్లు చెప్పారు. గత ప్రభుత్వ హయాంలో గృహ నిర్మాణ కార్యక్రమంలో అవకతవకలు జరిగాయని, అనువైనవి కాని ప్రాంతాల్లో ఇళ్ల స్థలాలు ఇచ్చారని చంద్రబాబు ఆరోపించారు. ప్రస్తుతం భూ సమస్యలను పరిష్కరించి పేదలకు నివాసయోగ్యమైన స్థలాలు, పక్కా ఇళ్లు అందించే దిశగా చర్యలు చేపడుతున్నామని తెలిపారు.