ఇంద్రకీలాద్రిపై దసరా సందడి.. ఏ రోజు ఏ అలంకారమో తెలుసా?

అక్టోబర్ 11 నుంచి 20 వరకు దసరా శరన్నవరాత్రి ఉత్సవాలు ఘనంగా నిర్వహించేందుకు దేశవ్యాప్తంగా దేవి ఆలయాలు, శక్తిపీఠాలు సిద్ధమవుతున్నాయి. విజయవాడ ఇంద్రకీలాద్రిపై కొలువైన శ్రీ కనకదుర్గమ్మ ఆలయంలోనూ నవరాత్రి వేడుకలకు ఏర్పాట్లు పూర్తయ్యాయి. ఈ ఏడాది పది రోజుల పాటు అమ్మవారు పది విభిన్న అలంకారాల్లో భక్తులకు దర్శనమివ్వనున్నారు. అక్టోబర్ 11న శ్రీ బాలా త్రిపురసుందరీ దేవిగా ఉత్సవాలు ప్రారంభం కాగా, 12న శ్రీ గాయత్రీ దేవి, 13న శ్రీ అన్నపూర్ణా దేవి, 14న శ్రీ మహాచండీ దేవి, 15న శ్రీ లలితా త్రిపురసుందరీ దేవి అలంకారాల్లో దర్శనమివ్వనున్నారు. అక్టోబర్ 16న మూలా నక్షత్రం సందర్భంగా శ్రీ సరస్వతీ దేవి అలంకారం, 17న శ్రీ మహాలక్ష్మి దేవి అలంకారం ఉంటాయి.

అక్టోబర్ 18న దుర్గాష్టమి సందర్భంగా శ్రీ దుర్గాదేవి అలంకారంలో, 19న మహర్నవమి సందర్భంగా శ్రీ మహిషాసురమర్ధిని దేవి అలంకారంలో అమ్మవారు భక్తులకు దర్శనమిస్తారు. అక్టోబర్ 20న విజయదశమి సందర్భంగా శ్రీ రాజరాజేశ్వరి దేవి అలంకారంతో నవరాత్రి ఉత్సవాలు ముగుస్తాయి. అదే రోజు సాయంత్రం కృష్ణా నదిలో హంసవాహనంపై అమ్మవారి తెప్పోత్సవాన్ని వైభవంగా నిర్వహించనున్నారు. ఈ వేడుకలను తిలకించేందుకు భక్తులు పెద్ద సంఖ్యలో తరలిరానున్నారు. నవరాత్రుల్లో కనకదుర్గమ్మను దర్శించుకోవడం శుభప్రదమని భక్తులు విశ్వసిస్తారు.