తేజస్‌ జెట్ల జాప్యం వాయుసేనకు నష్టం - ఎయిర్‌ చీఫ్‌ మార్షల్‌ అమర్‌ప్రీత్‌ సింగ్‌

యుద్ధ విమానాల స్క్వాడ్రన్ల సంఖ్య తగ్గుతున్న నేపథ్యంలో తేజస్‌ జెట్ల అందజేతలో జరుగుతున్న జాప్యం భారత వాయుసేనకు నష్టం కలిగిస్తోందని ఎయిర్‌ చీఫ్‌ మార్షల్‌ అమర్‌ప్రీత్‌ సింగ్‌ ఆందోళన వ్యక్తం చేశారు. దేశ భద్రతలో వైమానిక శక్తి కీలకంగా మారుతున్నందున తేజస్‌ విమానాలను వేగంగా అందించాల్సిన అవసరం ఉందన్నారు. రానున్న సంవత్సరాల్లో వాయుసేనకు ఏటా కనీసం 36–40 యుద్ధ విమానాలు అవసరమవుతాయని తెలిపారు. దేశీయ తేజస్‌ మార్క్‌-1ఏ, బహుళ ప్రయోజన యుద్ధ విమానాల ప్రాజెక్టు కింద రఫేల్‌ జెట్లను అందుబాటులోకి తీసుకురావడం ద్వారా స్క్వాడ్రన్ల కొరతను అధిగమించవచ్చని పేర్కొన్నారు.

హిందుస్థాన్‌ ఏరోనాటిక్స్‌ లిమిటెడ్‌ (హెచ్‌ఏఎల్‌) నుంచి తేజస్‌ విమానాల సరఫరాలో జాప్యంపై స్పందించిన అమర్‌ప్రీత్‌ సింగ్‌.. అది వాయుసేనకు నష్టం కలిగిస్తోందని అన్నారు. ప్రస్తుతం అనుమతించిన 42 ఫైటర్‌ స్క్వాడ్రన్లకు బదులుగా సంఖ్య 29కు తగ్గిందని, తేజస్‌ మార్క్‌-1ఏ, మార్క్‌-2, అడ్వాన్స్‌డ్‌ మీడియం కంబాట్‌ ఎయిర్‌క్రాఫ్ట్‌ (ఏఎంసీఏ) కోసం వాయుసేన ఎదురుచూస్తోందని తెలిపారు. చైనా, పాకిస్థాన్‌ ఐదో తరం యుద్ధ విమానాల విషయంలో సహకరిస్తున్నాయన్న వార్తలు ఆందోళన కలిగిస్తున్నా.. ఎలాంటి ముప్పునైనా ఎదుర్కొనే సామర్థ్యం వాయుసేనకు ఉందన్నారు. భవిష్యత్‌ యుద్ధాలను ఎదుర్కొనేందుకు కృత్రిమ మేధ ఆధారిత సాంకేతికతతో వాయుసేనను మరింత బలోపేతం చేయాల్సిన అవసరం ఉందని చెప్పారు.