

ప్రపంచవ్యాప్తంగా ప్రకృతి వైపరీత్యాలు తీవ్ర ప్రాణ, ఆర్థిక నష్టాలను మిగులుస్తున్నాయని జర్మనీకి చెందిన పర్యావరణ సంస్థ విడుదల చేసిన ‘క్లైమేట్ రిస్క్ ఇండెక్స్-2027’ నివేదిక వెల్లడించింది. తుర్కియేలో జరుగుతున్న కాప్31 వాతావరణ సదస్సు సందర్భంగా విడుదల చేసిన ఈ నివేదిక ప్రకారం.. 1996 నుంచి 2025 వరకు గడిచిన 30 ఏళ్లలో తీవ్రమైన వాతావరణ పరిస్థితుల కారణంగా ప్రపంచవ్యాప్తంగా దాదాపు 9 లక్షల మంది ప్రాణాలు కోల్పోయారు. సుమారు 550 కోట్ల మంది ప్రభావితమవగా, ప్రపంచ దేశాలకు 4.7 ట్రిలియన్ డాలర్లకు పైగా ఆర్థిక నష్టం వాటిల్లింది. ఈ కాలంలో వడగాలులు, ఉష్ణమండల తుపానులు, భారీ వర్షాలు, వరదలు సహా దాదాపు 10 వేల వాతావరణ విపత్తులు సంభవించాయి. అత్యధికంగా ప్రభావితమైన దేశాల జాబితాలో భారత్ 10వ స్థానంలో నిలిచింది. దేశంలో ఈ విపత్తుల కారణంగా సుమారు 78 వేల మంది మరణించినట్లు నివేదిక పేర్కొంది. దీర్ఘకాలిక వాతావరణ ముప్పును ఎదుర్కొన్న దేశాల్లో డొమినికా మొదటి స్థానంలో ఉండగా, మయన్మార్, హోండురాస్ తర్వాతి స్థానాల్లో నిలిచాయి. ముఖ్యంగా పేద దేశాలపై ప్రకృతి వైపరీత్యాల ప్రభావం తీవ్రంగా ఉన్నట్లు నివేదిక వెల్లడించింది.
2025లో సంభవించిన వాతావరణ విపత్తుల కారణంగా జమైకా, శ్రీలంక, స్పెయిన్ అత్యంత తీవ్రంగా ప్రభావితమైనట్లు నివేదిక పేర్కొంది. ఆ తర్వాత థాయ్లాండ్, ఫిలిప్పీన్స్, పాకిస్థాన్ ఉన్నాయి. జమైకాలో కేటగిరీ-5 హరికేన్ మెలిస్సా కారణంగా 62 మంది మరణించగా, ఆ దేశ వార్షిక జీడీపీలో దాదాపు సగానికి సమానమైన ఆర్థిక నష్టం వాటిల్లింది. శ్రీలంకలో దిత్వా తుపాను కారణంగా 823 మంది ప్రాణాలు కోల్పోగా, 17 లక్షల మందికి పైగా ప్రభావితమయ్యారు. స్పెయిన్లో రికార్డు స్థాయి ఉష్ణోగ్రతలు నమోదయ్యాయి. గత మూడు దశాబ్దాల్లో వడగాలుల కారణంగానే అత్యధిక మరణాలు సంభవించగా, తుపానుల వల్ల భారీ ఆర్థిక నష్టాలు నమోదయ్యాయి. ఒక్క 2025లోనే ప్రపంచవ్యాప్తంగా తీవ్రమైన వాతావరణ పరిస్థితుల కారణంగా సుమారు 35 వేల మంది మరణించినట్లు నివేదిక వెల్లడించింది. భవిష్యత్తులో ఇలాంటి విపత్తుల ప్రభావాన్ని తగ్గించేందుకు ముందస్తు హెచ్చరిక వ్యవస్థలు, వరద నియంత్రణ చర్యలు, వాతావరణ మార్పులకు అనుగుణమైన ప్రణాళికల్లో పెట్టుబడులు పెంచాలని సూచించింది. అలాగే కర్బన ఉద్గారాలను వేగంగా తగ్గించడంతో పాటు వాతావరణ ముప్పును ఎదుర్కొంటున్న పేద దేశాలకు ఆర్థిక సహాయాన్ని పెంచాలని ప్రపంచ దేశాలకు పిలుపునిచ్చింది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!