ఆదిలాబాద్ రిమ్స్‌లో అగ్ని ప్రమాదం.. సీఎం విచారం

ఆదిలాబాద్ రిమ్స్ ఆసుపత్రిలోని ఎస్‌ఎన్‌సీయూ వార్డులో సోమవారం అర్ధరాత్రి భారీ అగ్ని ప్రమాదం చోటుచేసుకుంది. షార్ట్‌సర్క్యూట్ కారణంగా ఏసీ యూనిట్ పేలడంతో మంటలు చెలరేగి వార్డు మొత్తం దట్టమైన పొగ కమ్ముకుంది. ఆ సమయంలో వార్డులో ఉన్న చిన్నారులను సిబ్బంది, తల్లిదండ్రులు అప్రమత్తంగా బయటకు తరలించారు. అద్దాలు పగలగొట్టి మరికొందరు చిన్నారులను రక్షించినట్లు సమాచారం. ఈ ఘటనలో ఇద్దరు చిన్నారులు మృతి చెందగా, పలువురు అస్వస్థతకు గురయ్యారు. బాధిత చిన్నారులను ఆదిలాబాద్‌లోని వివిధ ఆసుపత్రులకు తరలించి చికిత్స అందిస్తున్నారు.

రిమ్స్‌లో జరిగిన అగ్ని ప్రమాదంపై ముఖ్యమంత్రి ఎ. రేవంత్ రెడ్డి విచారం వ్యక్తం చేశారు. మృతి చెందిన చిన్నారుల కుటుంబాలకు ప్రగాఢ సానుభూతి తెలిపారు. ఆసుపత్రుల్లో చికిత్స పొందుతున్న చిన్నారులకు మెరుగైన వైద్యం అందించాలని, వారి ఆరోగ్య పరిస్థితిని నిరంతరం పర్యవేక్షించాలని అధికారులను ఆదేశించారు. ప్రమాదానికి దారితీసిన కారణాలపై సమగ్ర విచారణ జరిపి నివేదిక సమర్పించాలని, భవిష్యత్తులో ఇలాంటి ఘటనలు పునరావృతం కాకుండా అన్ని ఆసుపత్రుల్లో భద్రతా చర్యలను పటిష్ఠం చేయాలని సీఎం ఆదేశించారు.