బియ్యం ధరల మోసాలకు తెలంగాణ ప్రభుత్వం చెక్!

బియ్యం కృత్రిమ కొరత సృష్టించడం, అధిక ధరలకు విక్రయించడం, వినియోగదారులను మోసం చేయడం వంటి అక్రమాలను అరికట్టేందుకు తెలంగాణ పౌరసరఫరాల శాఖ కీలక చర్యలు చేపట్టింది. పౌరసరఫరాల కమిషనర్, ప్రభుత్వ ప్రత్యేక ప్రధాన కార్యదర్శి శ్రీ ఎం. స్టీఫెన్ రవీంద్ర, ఐపీఎస్ ఆదేశాల మేరకు ఎన్‌ఫోర్స్‌మెంట్ టాస్క్‌ఫోర్స్ (ETF), లీగల్ మెట్రాలజీ శాఖ సంయుక్తంగా రాష్ట్రవ్యాప్తంగా తనిఖీలు నిర్వహించాయి. ఇందులో భాగంగా బియ్యం రకాలకు గరిష్ఠ చిల్లర ధరలను నిర్ణయించారు. బీపీటీ/కేఎన్‌ఎం బియ్యం కిలో రూ.66కు, ఆర్‌ఎన్‌ఆర్/తెలంగాణ సోనా కిలో రూ.74కు, హెచ్‌ఎంటీ/జేఎస్‌ఆర్ బియ్యం కిలో రూ.79కు మించి విక్రయించకూడదని స్పష్టం చేశారు. 26 కిలోల ప్యాకెట్లపై ఈ గరిష్ఠ ధరలను స్పష్టంగా ముద్రించాలని మిల్లర్లు, వ్యాపారులకు ఆదేశాలు జారీ చేశారు.

అక్టోబర్ 29 నుంచి నవంబర్ 5, 2026 వరకు వారం రోజుల పాటు నిర్వహించిన ప్రత్యేక తనిఖీల్లో ఎన్‌ఫోర్స్‌మెంట్ టాస్క్‌ఫోర్స్ బృందాలు రైస్ మిల్లులు, హోల్‌సేల్ దుకాణాలు, రిటైల్ విక్రయ కేంద్రాల్లో మొత్తం 1,141 ఆకస్మిక తనిఖీలు నిర్వహించాయి. ఈ తనిఖీల్లో నిబంధనలు ఉల్లంఘించిన వారిపై 55 కేసులు నమోదు చేయగా, వాటిలో 35 క్రిమినల్ కేసులు ఉన్నాయి. మరోవైపు లీగల్ మెట్రాలజీ శాఖ 1,545 తనిఖీలు నిర్వహించి, 280 కేసులు నమోదు చేసింది. 25 కిలోల బియ్యం ఉన్న బస్తాలపై 26 కిలోలుగా లేబుల్స్ వేయడం, తయారీదారులు ముద్రించిన అసలు ధరలను అధిక ధరల స్టిక్కర్లతో కప్పివేయడం, పీడీఎస్ బియ్యాన్ని అక్రమంగా నిల్వ చేయడం, జీఎస్టీ లేదా ఎఫ్‌ఎస్‌ఎస్‌ఏఐ లైసెన్సులు లేకుండా వ్యాపారం చేయడం వంటి అక్రమాలను అధికారులు గుర్తించారు. పదేపదే పీడీఎస్ బియ్యాన్ని నిల్వ చేయడం లేదా ధరల మోసాలకు పాల్పడే వారిపై ప్రివెంటివ్ డిటెన్షన్ (PD) చట్టంతో పాటు అత్యవసర వస్తువుల చట్టం, భారతీయ న్యాయ సంహిత (BNS) కింద చర్యలు తీసుకుంటామని హెచ్చరించారు. వినియోగదారుల ప్రయోజనాలను కాపాడేందుకు రాష్ట్రవ్యాప్తంగా నిరంతర నిఘా, తనిఖీలు కొనసాగుతాయని పౌరసరఫరాల శాఖ స్పష్టం చేసింది.