సీబీఐ పగ్గాల నుంచి రాజకీయాల్లోకి.. నాగేశ్వరరావు కీలక నిర్ణయం

దాదాపు నాలుగు దశాబ్దాల పరిపాలనా అనుభవం ఉన్న మాజీ సీబీఐ డైరెక్టర్‌ ఎం. నాగేశ్వరరావు రాజకీయాల్లోకి అడుగుపెట్టారు. కాశీ వేదికగా సర్వజన సనాతన్‌ పార్టీ (SSP) జాతీయ అధ్యక్షుడిగా బాధ్యతలు స్వీకరించిన ఆయన.. ‘ఆధునిక భారత్‌.. సనాతన మూలాలతో’ అనే నినాదంతో తన రాజకీయ ప్రస్థానాన్ని ప్రారంభించారు. భారత్‌ పునర్నిర్మాణం కేవలం పరిపాలనా సంస్కరణలతో సాధ్యం కాదని, ఆధునిక అభివృద్ధిని దేశ నాగరికత మూలాలతో అనుసంధానించాలని పేర్కొన్నారు. రానున్న ఉత్తరప్రదేశ్‌ అసెంబ్లీ ఎన్నికలకు పార్టీ సిద్ధమవుతోందని తెలిపారు. విద్య, ఆరోగ్యం, జీవనోపాధి, నాగరికతతో అనుసంధానాన్ని పార్టీ ప్రధాన అంశాలుగా పేర్కొన్నారు.

సనాతనం అంటే కేవలం ఆరాధనా విధానం కాదని, సత్యం, ధర్మం, బాధ్యత, కరుణ, న్యాయం, ఆత్మనియంత్రణ, ప్రకృతి, కుటుంబం, సమాజం, ప్రజా సంక్షేమం వంటి విలువలతో కూడిన జీవన విధానమని నాగేశ్వరరావు వివరించారు. గతంలోకి వెళ్లడం తమ లక్ష్యం కాదని, భారతీయ నాగరికత మూలాలను కాపాడుకుంటూనే ఆధునిక భారత్‌ను నిర్మించడమే ఉద్దేశమని చెప్పారు. సీబీఐలో ఉన్న సమయంలో శారదా, రోజ్‌ వ్యాలీ చిట్‌ఫండ్‌, అగస్టా వెస్ట్‌ల్యాండ్‌, విజయ్‌ మాల్యా తదితర కేసుల దర్యాప్తును పర్యవేక్షించిన ఆయన.. ఒడిశా పోలీస్‌ అధికారిగా ఉన్నప్పుడు కూడా పలు కీలక దర్యాప్తులు, నక్సల్స్‌ వ్యతిరేక ఆపరేషన్లలో పనిచేశారు.