ఎవరెస్ట్ జీలకర్ర పొడిపై ఎఫ్ఎస్ఎస్ఏఐ కీలక ఆదేశాలు

ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (ఎఫ్ఎస్ఎస్ఏఐ) ఎవరెస్ట్ ఫుడ్ ప్రొడక్ట్స్‌కు చెందిన ప్రీ-ప్యాక్డ్ జీలకర్ర పొడి నిర్దిష్ట బ్యాచ్‌ను వెంటనే మార్కెట్ నుంచి వెనక్కి తీసుకోవాలని ఆదేశించింది. గోవాలోని రివర్‌సైడ్ రిసార్ట్స్ అండ్ హాలిడే హోమ్స్ నుంచి సేకరించిన నమూనాలో అజోక్సిస్ట్రోబిన్, థయామెథోక్సామ్ పురుగుమందుల అవశేషాలు నిర్దేశిత గరిష్ఠ పరిమితికి మించి ఉన్నట్లు ఫుడ్ అనలిస్ట్ పరీక్షల్లో తేలింది. కంపెనీ అప్పీల్ అనంతరం రిఫరల్ ఫుడ్ ల్యాబొరేటరీలో నిర్వహించిన పరీక్షల్లోనూ నమూనా ‘అన్‌సేఫ్’గా నిర్ధారణ అయింది.

దీంతో సంబంధిత మొత్తం బ్యాచ్‌ను వెంటనే రీకాల్ చేసి, రీకాల్ ప్రక్రియకు సంబంధించిన పూర్తి వివరాలు, నివేదికలు సమర్పించాలని ఎఫ్ఎస్ఎస్ఏఐ ఎవరెస్ట్ సంస్థను ఆదేశించింది. ఇదిలా ఉండగా, మరో చర్యలో భాగంగా వెస్ట్ బెంగాల్‌కు చెందిన క్రియేటివ్ బేకర్స్ అండ్ కన్ఫెక్షనర్స్ ప్రైవేట్ లిమిటెడ్ లైసెన్స్‌ను తీవ్రమైన పరిశుభ్రత, ఆహార భద్రత లోపాల కారణంగా తక్షణమే సస్పెండ్ చేసింది. ఉత్పత్తి ప్రాంతాల్లో దుమ్ము, మురికి, ఈగలు, పురుగుల సమస్య, బహిరంగంగా నిల్వ చేసిన ముడి పదార్థాలు, సరైన ఆహార భద్రత రికార్డుల నిర్వహణలో లోపాలను అధికారులు గుర్తించారు.