కాగిత పరిశ్రమలో పర్యావరణహిత విధానాలకు ప్రాధాన్యమివ్వాలి: గవర్నర్ శివ ప్రతాప్ శుక్లా

తెలంగాణ గవర్నర్‌ శివ ప్రతాప్‌ శుక్లా కాగిత పరిశ్రమలో ఆధునిక సాంకేతికత, రీసైక్లింగ్‌, పర్యావరణహిత ఉత్పత్తి విధానాలకు ప్రాధాన్యమివ్వాలని సూచించారు. పారిశ్రామిక అభివృద్ధితోపాటు పర్యావరణ పరిరక్షణ, సామాజిక బాధ్యతను కూడా పరిశ్రమలు విస్మరించకూడదని అన్నారు. హైదరాబాద్‌లోని నోవాటెల్‌ హెచ్‌ఐసీసీలో తెలంగాణ పేపర్‌ మర్చంట్స్‌ అసోసియేషన్‌ సహకారంతో నిర్వహిస్తున్న ఫెడరేషన్‌ ఆఫ్‌ పేపర్‌ ట్రేడర్స్‌ అసోసియేషన్స్‌ (FPTA) 65వ వార్షిక సర్వసభ్య సమావేశం, జాతీయ సదస్సులో ఆయన ముఖ్య అతిథిగా పాల్గొని ప్రసంగించారు. అక్టోబర్‌ 3 నుంచి 5 వరకు జరుగుతున్న ఈ సదస్సుకు దేశవ్యాప్తంగా 1,000 మందికి పైగా పేపర్‌ వ్యాపారులు, తయారీదారులు, పరిశ్రమ ప్రతినిధులు హాజరవుతున్నారు.

కాగితం కేవలం వ్యాపార వస్తువు మాత్రమే కాదని, విద్య, అక్షరాస్యత, ప్రచురణ, ముద్రణ, ప్యాకేజింగ్‌, సమాచార వ్యాప్తిలో కీలక పాత్ర పోషిస్తోందని గవర్నర్‌ పేర్కొన్నారు. మారుతున్న పరిస్థితులకు అనుగుణంగా డిజిటలీకరణ, ఆధునిక సాంకేతికత, సమర్థవంతమైన సరఫరా వ్యవస్థలను అందిపుచ్చుకోవాలని సూచించారు. రీసైక్లింగ్‌, ఇంధన సామర్థ్యం, వనరుల పొదుపు, స్థిరమైన ఉత్పత్తి విధానాలను విస్తృతంగా అమలు చేయాలని పిలుపునిచ్చారు. యువత నైపుణ్యాలు, కొత్త ఆలోచనలు, ఔత్సాహికతను పరిశ్రమ అభివృద్ధికి వినియోగించుకోవాలని, విద్య, వైద్యం, నైపుణ్యాభివృద్ధి, సామాజిక సేవలకు కూడా పరిశ్రమలు ప్రాధాన్యం ఇవ్వాలని సూచించారు.