

తెలంగాణకు 85వ ఇండియన్ రోడ్స్ కాంగ్రెస్ (ఐఆర్సీ) సమావేశాలకు ఆతిథ్యం ఇచ్చే అవకాశం దక్కడం గర్వకారణమని రాష్ట్ర రోడ్లు, భవనాల శాఖ మంత్రి కోమటిరెడ్డి వెంకట్రెడ్డి తెలిపారు. ఈ నెల 19 నుంచి 22 వరకు హైదరాబాద్లోని హైటెక్స్లో ఈ సమావేశాలు నిర్వహించనున్నట్లు వెల్లడించారు. కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీ, ముఖ్యమంత్రి రేవంత్రెడ్డి చేతుల మీదుగా కార్యక్రమం ప్రారంభం కానుందని పేర్కొన్నారు. దేశవిదేశాల నుంచి 3,500 మందికిపైగా రహదారుల రంగ నిపుణులు, ఇంజినీర్లు, అధికారులు ఈ సమావేశాలకు హాజరుకానున్నట్లు మంగళవారం విడుదల చేసిన ప్రకటనలో వివరించారు.
ఈ సమావేశాలు తెలంగాణ సంస్కృతి, ఆతిథ్యాన్ని ప్రపంచానికి పరిచయం చేసేందుకు మంచి వేదికగా నిలుస్తాయని మంత్రి పేర్కొన్నారు. అతిథులకు వసతి, భోజనం, రవాణా, భద్రత పరంగా ఎలాంటి ఇబ్బందులు కలగకుండా ఏర్పాట్లు చేస్తున్నట్లు తెలిపారు. సుమారు 400 స్టాళ్లతో సాంకేతిక ప్రదర్శన, 19 ప్రత్యేక సమావేశాలు నిర్వహించనున్నట్లు వెల్లడించారు. సొరంగ మార్గాల నిర్మాణం, ఆధునిక ఇంజినీరింగ్ విధానాలు, రోడ్డు ప్రమాదాల నివారణ, ఏఐ, డిజిటల్ టెక్నాలజీ, ఎలక్ట్రిక్ వాహనాలు, పర్యావరణహిత రహదారుల నిర్మాణం వంటి అంశాలపై నిపుణులు చర్చించనున్నారు. తెలంగాణ ప్రభుత్వం ప్రత్యేక పెవిలియన్ను ఏర్పాటు చేసి రాష్ట్రంలో నిర్మిస్తున్న రహదారులు, వంతెనలు, ఆసుపత్రులు, ఇతర అభివృద్ధి కార్యక్రమాలను ప్రదర్శించనుందని కోమటిరెడ్డి వెంకట్రెడ్డి వెల్లడించారు.























కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!