మల్లంపేటలో అక్రమ లేఅవుట్‌ కలకలం

మల్లంపేటలో తప్పుడు లేఅవుట్‌ ద్వారా అక్రమ అనుమతులు మంజూరయ్యాయన్న ఆరోపణలు చర్చనీయాంశంగా మారాయి. మున్సిపాలిటీల విలీనానికి ముందే అనుమతులు ఇచ్చినట్లు ఆరోపణలు వినిపిస్తున్నాయి. సర్వే నంబర్లు 170/3, 170/4, 170/5లో సుమారు 14.5 ఎకరాల్లో ఉన్న జీఎల్‌సీ లేఅవుట్‌లో 200కు పైగా నిర్మాణాలను నిబంధనలకు విరుద్ధంగా గుర్తించినట్లు సమాచారం. వాటికి ఏ1, బి1, సి1, డి1 వంటి ప్లాట్‌ నంబర్లు కేటాయించినట్లు ఆరోపణలు ఉన్నాయి. ఈ వ్యవహారంలో అధికారుల నిర్లక్ష్యం, రాజకీయ జోక్యం ఉందన్న ఆరోపణలు కూడా వ్యక్తమవుతున్నాయి.

వివాదాస్పద భూములకు గతంలో మంజూరైన అనుమతుల ఆధారంగా మార్టిగేజ్‌ రిజిస్ట్రేషన్లు కొనసాగినట్లు ఆరోపణలు ఉన్నాయి. సర్వే నంబర్లు 170/1, 170/3, 170/4, 170/5లో అనధికారిక లేఅవుట్లు, విల్లాల నిర్మాణాలు, అనుమానాస్పద రిజిస్ట్రేషన్లపై విచారణ జరపాలని డిమాండ్లు వస్తున్నాయి. ఎలాంటి ఆమోదం లేకుండా కొన్ని ప్లాట్‌ నంబర్లు సృష్టించి అనుమతులు ఇచ్చినట్లు, మరో 16 దరఖాస్తులను షార్ట్‌ఫాల్‌ పేరుతో పెండింగ్‌లో ఉంచినట్లు అధికారిక వెబ్‌సైట్‌ వివరాలను ఉటంకిస్తూ ఆరోపణలు ఉన్నాయి. ఈ వ్యవహారంపై ఉన్నతాధికారులు సమగ్ర విచారణ చేపట్టి, నిబంధనలు ఉల్లంఘించినట్లు తేలితే చర్యలు తీసుకోవాలని కోరుతున్నారు.