సముద్రగర్భంలో స్వదేశీ నిఘా నేత్రం ‘జయ’

సీఎస్‌ఐఆర్‌–నేషనల్‌ ఇన్‌స్టిట్యూట్‌ ఆఫ్‌ ఓషనోగ్రఫీ, నౌకాదళ డిజైన్‌ సబ్‌మెరైన్‌ గ్రూప్‌ సహకారంతో ‘జయ’ అనే స్వదేశీ స్వయంచాలిత నీటి అడుగుభాగ వాహనాన్ని అభివృద్ధి చేసింది. అధునాతన సముద్రగర్భ కార్యకలాపాల కోసం రూపొందించిన ఈ సాంకేతికతను హిందుస్థాన్‌ షిప్‌యార్డ్‌ లిమిటెడ్‌కు బదిలీ చేశారు. దీంతో ‘జయ’ను పెద్ద ఎత్తున ఉత్పత్తి చేసే దిశగా అడుగులు పడుతున్నాయి.

సముద్రంలో స్వతంత్రంగా పనిచేసే సామర్థ్యంతో రూపొందిన ‘జయ’ను అవసరమైన మిషన్‌కు అనుగుణంగా వివిధ సెన్సార్‌ వ్యవస్థలతో అమర్చవచ్చు. సముద్ర పరిశోధన, నీటి అడుగుభాగ నిఘా, సముద్ర భద్రత వంటి రంగాల్లో దీనిని వినియోగించే అవకాశం ఉంది. పరిశోధన దశ నుంచి పారిశ్రామిక స్థాయి ఉత్పత్తికి మారడం ద్వారా దేశీయ సముద్ర సాంకేతిక సామర్థ్యాలు మరింత బలోపేతం కానున్నాయి.