‘సర్‌’ ప్రక్రియపై సుదర్శన్‌ రెడ్డి కీలక ఆదేశాలు

తెలంగాణ రాష్ట్రవ్యాప్తంగా ప్రత్యేక ఓటర్ల జాబితా సవరణ ప్రక్రియలో భాగంగా ఇప్పటివరకు 60 శాతం మంది ఓటర్లకు నోటీసులు పంపిణీ చేసినట్లు రాష్ట్ర ఎన్నికల ప్రధాన అధికారి సి. సుదర్శన్‌ రెడ్డి తెలిపారు. ఈ నెలాఖరులోగా ప్రక్రియను పూర్తి చేస్తామని చెప్పారు. శుక్రవారం జిల్లా కలెక్టర్‌ దీపక్‌ తివారితో కలిసి వికారాబాద్‌ పట్టణంలోని ఆలంపల్లి, శివారెడ్డిపేట, తాండూరులో ఆయన పర్యటించారు. జిల్లాలో కొనసాగుతున్న ప్రత్యేక ఓటర్ల జాబితా సవరణ ప్రక్రియను ఎన్నికల మార్గదర్శకాలకు అనుగుణంగా ఎలాంటి పొరపాట్లకు తావులేకుండా పూర్తి చేయాలని అధికారులను ఆదేశించారు. ఇప్పటివరకు జారీ చేసిన నోటీసులు, ఇంకా పంపిణీ చేయాల్సిన నోటీసుల వివరాలను బూత్‌ స్థాయి అధికారులను అడిగి తెలుసుకున్నారు.

అనంతరం కలెక్టరేట్‌ సమావేశ మందిరంలో ఓటర్ల నమోదు అధికారులు, తహసీల్దార్లతో సుదర్శన్‌రెడ్డి సమీక్ష నిర్వహించారు. అర్హత ఉన్న ఏ ఒక్క ఓటరు పేరును జాబితా నుంచి తొలగించకుండా తగిన జాగ్రత్తలు తీసుకోవాలని సూచించారు. ప్రతి దశను సమర్థంగా పూర్తి చేయడంతో పాటు రాజకీయ పార్టీల ప్రతినిధులతో సమావేశాలు నిర్వహించాలని ఆదేశించారు. అంతకుముందు కలెక్టరేట్‌లో పోలీసుల గౌరవ వందనం స్వీకరించారు. సమావేశంలో అదనపు కలెక్టర్‌ వెంకటాచారి, శిక్షణ కలెక్టర్‌ సచిన్‌ బస్వరాజ్‌ గుట్టూర్, డీఎస్పీ అంజయ్య, జిల్లా రెవెన్యూ అధికారి స్వర్ణలత, రెవెన్యూ డివిజనల్‌ అధికారులు వాసుచంద్ర, అనిత, వికారాబాద్‌, పరిగి, కొడంగల్‌ పురపాలక కమిషనర్లు, ఎన్నికల అధికారులు పాల్గొన్నారు.