హైవే విస్తరణపై ఎన్‌హెచ్‌ఏఐ ఛైర్మన్‌తో మంత్రి కోమటిరెడ్డి భేటీ

హైదరాబాద్‌-విజయవాడ జాతీయ రహదారిని ఆరు వరుసలుగా విస్తరించే పనులను 2027 జనవరిలో ప్రారంభించనున్నట్లు ఎన్‌హెచ్‌ఏఐ ఛైర్మన్‌ సంతోష్‌కుమార్‌ యాదవ్‌ వెల్లడించారని రాష్ట్ర రోడ్లు, భవనాల శాఖ మంత్రి కోమటిరెడ్డి వెంకట్‌రెడ్డి తెలిపారు. ఈ ఏడాది నవంబరు 11 వరకు టెండర్లు దాఖలు చేసేందుకు గడువు ఉందని, ఆ ప్రక్రియ ముగిసిన వెంటనే తదుపరి పనులు ప్రారంభమవుతాయని పేర్కొన్నారు. ఈ విషయంపై మంత్రి సోమవారం దిల్లీలో ఎన్‌హెచ్‌ఏఐ ఛైర్మన్‌తో సమావేశమయ్యారు. జాతీయ రహదారిపై వాహనాల రద్దీ పెరగడం వల్ల తరచూ ప్రమాదాలు జరుగుతున్నాయని, రహదారి విస్తరణతో ఈ సమస్యను తగ్గించవచ్చని ఆయన వివరించారు.

హైదరాబాద్‌-విజయవాడ జాతీయ రహదారిని ఆరు వరుసలుగా అభివృద్ధి చేయడంతో పాటు మరో రెండు వరుసలను సర్వీసు రహదారులుగా నిర్మించాలని మంత్రి కోమటిరెడ్డి వెంకట్‌రెడ్డి ఎన్‌హెచ్‌ఏఐ ఛైర్మన్‌ను కోరారు. ఈ చర్యలతో వాహనాల రద్దీ తగ్గి, రోడ్డు ప్రమాదాలను నియంత్రించేందుకు అవకాశం ఉంటుందని వివరించారు. ఈ ప్రతిపాదనపై ఎన్‌హెచ్‌ఏఐ ఛైర్మన్‌ సానుకూలంగా స్పందించినట్లు మంత్రి సోమవారం విడుదల చేసిన ప్రకటనలో తెలిపారు.