ఢిల్లీ సభకు ప్రత్యేక రైళ్లు లేవు.. బస్సులపై కాంగ్రెస్ నాయకత్వం దృష్టి!

ఢిల్లీలో నిర్వహించనున్న కాంగ్రెస్ సభకు తెలంగాణ నుంచి భారీ సంఖ్యలో పార్టీ కార్యకర్తలను తరలించే విషయంలో పీసీసీ నాయకత్వం ఏర్పాట్లపై కసరత్తు చేస్తోంది. సుమారు 10 వేల నుంచి 15 వేల మంది కార్యకర్తలను ఢిల్లీకి తీసుకెళ్లాలని భావిస్తున్నప్పటికీ, ప్రత్యేక రైళ్లు అందించడం సాధ్యం కాదని దక్షిణ మధ్య రైల్వే తెలిపినట్లు సమాచారం. దీంతో కార్యకర్తల ప్రయాణ ఏర్పాట్లపై కాంగ్రెస్ నాయకత్వం ప్రత్యామ్నాయ మార్గాలను పరిశీలిస్తోంది.

హైదరాబాద్ నుంచి ఢిల్లీకి రైలు ప్రయాణానికి సుమారు 36 గంటలు పట్టే అవకాశం ఉండటంతో బస్సులను వినియోగించడంపై పీసీసీ దృష్టి సారించినట్లు తెలుస్తోంది. ఈ నెల 30న హైదరాబాద్ నుంచి బయలుదేరేలా ప్రణాళిక రూపొందిస్తున్నట్లు సమాచారం. ప్రయాణ ఏర్పాట్లు, కార్యకర్తల తరలింపుపై పీసీసీ చీఫ్ ముఖ్యమంత్రి రేవంత్ రెడ్డితో ఎప్పటికప్పుడు చర్చిస్తున్నట్లు తెలుస్తోంది. అయితే, తుది ప్రయాణ ప్రణాళిక, తరలించే కార్యకర్తల సంఖ్యపై అధికారిక స్పష్టత రావాల్సి ఉంది.