మరో రుణ సేకరణకు తెలంగాణ సర్కార్‌ కసరత్తు

తెలంగాణ ప్రభుత్వం మరోసారి భారీగా రుణాలు సమీకరించేందుకు సిద్ధమవుతోంది. 2026-27 ఆర్థిక సంవత్సరంలో అక్టోబర్‌ నుంచి డిసెంబర్‌ వరకు మూడో త్రైమాసికంలో రూ.13 వేల కోట్ల రుణం సమీకరించేందుకు రాష్ట్ర ప్రభుత్వం ప్రతిపాదించింది. ఈ రుణం సమీకరణ పూర్తయితే మూడు త్రైమాసికాల్లో తెలంగాణ తీసుకున్న మార్కెట్‌ రుణాలు రూ.59,400 కోట్లకు చేరనున్నాయి. ఇది 2026-27 వార్షిక రుణ లక్ష్యమైన రూ.58,458.71 కోట్లను సుమారు రూ.941 కోట్ల మేర అధిగమించనుంది.

ఇప్పటికే ప్రస్తుత ఆర్థిక సంవత్సరం తొలి ఆరు నెలల్లో తెలంగాణ ప్రభుత్వం రూ.46,400 కోట్ల రుణాన్ని సమీకరించింది. ఏప్రిల్‌ నుంచి జూన్‌ వరకు జరిగిన తొలి త్రైమాసికంలో రూ.18,900 కోట్లు, జూలై నుంచి సెప్టెంబర్‌ వరకు జరిగిన రెండో త్రైమాసికంలో రూ.27,500 కోట్ల రుణాన్ని తీసుకుంది. దీంతో వార్షిక రుణ లక్ష్యంలో దాదాపు 80 శాతం ఇప్పటికే వినియోగించినట్లైంది.

ఇదిలా ఉండగా, ఆర్‌బీఐ నిర్వహించే వేలం ద్వారా తెలంగాణ ప్రభుత్వం మరో రూ.2,500 కోట్ల రుణం సమీకరించేందుకు ప్రతిపాదించింది. ఇందులో 20 ఏళ్ల కాలపరిమితితో రూ.1,000 కోట్లు, 26 ఏళ్ల కాలపరిమితితో రూ.1,500 కోట్లు సమీకరించనుంది. చివరి త్రైమాసికంలో మరో రూ.10 వేల కోట్ల నుంచి రూ.15 వేల కోట్ల వరకు రుణం తీసుకునే అవకాశం ఉందని ఆర్థిక పరిశీలకులు అంచనా వేస్తున్నారు. అయితే వాస్తవ రుణ సమీకరణ రాష్ట్ర అవసరాలు, అనుమతులు, మార్కెట్ పరిస్థితులపై ఆధారపడి ఉంటుంది.