తెలంగాణకు కీలక రహదారి ప్రాజెక్టులు.. నితిన్ గడ్కరీతో కోమటిరెడ్డి భేటీలో కీలక నిర్ణయాలు

తెలంగాణలో రహదారి కనెక్టివిటీని మెరుగుపరిచే లక్ష్యంతో రాష్ట్ర రోడ్లు, భవనాలు, సినిమాటోగ్రఫీ శాఖ మంత్రి కోమటిరెడ్డి వెంకట్ రెడ్డి ఢిల్లీలో కేంద్ర రోడ్డు రవాణా, జాతీయ రహదారుల శాఖ మంత్రి నితిన్ గడ్కరీతో ప్రత్యేకంగా భేటీ అయ్యారు. ఈ సందర్భంగా రాష్ట్రంలో చేపట్టాల్సిన కీలక రహదారులు, వంతెనలు, ఎలివేటెడ్ కారిడార్లు, రోప్‌వేలు, ఇతర మౌలిక వసతుల ప్రాజెక్టులపై చర్చించారు. ఎల్బీనగర్–హయత్‌నగర్ డబుల్ డెక్కర్ ఎలివేటెడ్ కారిడార్‌కు ఆమోదం లభించిందని, NH-167Kపై తెలంగాణ–ఆంధ్రప్రదేశ్ మధ్య అనుసంధానాన్ని మెరుగుపరిచేలా కృష్ణా నదిపై ఐకానిక్ కేబుల్ బ్రిడ్జి నిర్మాణ ప్రతిపాదనకు కూడా సానుకూలత లభించిందని వెల్లడించారు.

హైదరాబాద్–శ్రీశైలం NH-765పై ఎలివేటెడ్ కారిడార్ నిర్మాణానికి కొత్త డీపీఆర్ సిద్ధం చేయాలని అధికారులకు ఆదేశాలు జారీ అయ్యాయి. పర్వతమాల పథకం కింద ఐదు రోప్‌వేలు, సేతు బంధన్ పథకం కింద మూడు రైల్వే ఓవర్ బ్రిడ్జిల నిర్మాణ ప్రతిపాదనలకు ఆమోదం లభించినట్లు తెలిపారు. హైదరాబాద్–అమరావతి గ్రీన్‌ఫీల్డ్ హైవే ప్రతిపాదనపైనా కేంద్ర మంత్రి సానుకూలంగా స్పందించారు. తెలంగాణలో 34 పనులకు CRIF నిధులు మంజూరు చేయాలని కోమటిరెడ్డి కోరగా, సంబంధిత అధికారులకు గడ్కరీ సూచనలు ఇచ్చారు. పుల్లూరు నుంచి నల్గొండ వరకు పలు రాష్ట్ర రహదారులను జాతీయ రహదారులుగా అప్‌గ్రేడ్ చేసే ప్రతిపాదనపైనా చర్చ జరిగింది. నవంబర్ 19 నుంచి 22 వరకు హైదరాబాద్‌లో జరగనున్న ఇండియన్ రోడ్ కాంగ్రెస్ కార్యక్రమానికి హాజరవుతానని గడ్కరీ తెలిపినట్లు వెల్లడించారు. ఈ సమావేశంలో మంత్రి జూపల్లి కృష్ణారావుతో పాటు పలువురు ప్రజాప్రతినిధులు, అధికారులు పాల్గొన్నారు.