ఫైటర్ జెట్‌ను ఒంటరిగా నడిపిన థాయ్‌లాండ్ రాణి సుథీదా...

థాయ్‌లాండ్‌ రాణి సుథీదా మరోసారి వార్తల్లో నిలిచారు. ఆమె జేఏఎస్ 39సీ గ్రిపెన్ యుద్ధ విమానంలో తన సోలో ఫ్లైట్‌ను విజయవంతంగా పూర్తి చేశారు. సూరత్ థాని ప్రావిన్స్‌లోని వింగ్ 7 ఎయిర్‌బేస్ నుంచి ఈ ప్రయాణాన్ని చేపట్టారు. విమానయానంలో కఠిన శిక్షణ పొందుతున్న రాణి ఈ ఫ్లైట్‌ను విజయవంతంగా ముగించారు. రాజు మహా వజ్రలాంగ్‌కోర్న్‌ ఈ ప్రయాణాన్ని ప్రత్యక్షంగా వీక్షించి, అనంతరం రాణిని అభినందించారు. ఈ ప్రత్యేక ఘట్టానికి సంబంధించిన వీడియోను థాయ్ రాజకుటుంబం అధికారిక ఎక్స్ ఖాతాలో పంచుకోవడంతో అది సామాజిక మాధ్యమాల్లో విస్తృతంగా ప్రచారంలోకి వచ్చింది.

థాయ్ రాజదంపతులకు విమానయానంపై ఆసక్తి ఉండటం విశేషం. గతేడాది భూటాన్‌ పర్యటన సందర్భంగా రాజకుటుంబానికి చెందిన బోయింగ్ 737-800 విమానాన్ని రాజు మహా వజ్రలాంగ్‌కోర్న్‌ స్వయంగా నడపగా, రాణి సుథీదా కో-పైలట్‌గా వ్యవహరించారు. రాజుకు సైనిక విమానయానంలో అనుభవం ఉండటంతో పాటు ఎఫ్‌-5, ఎఫ్‌-16, బోయింగ్ 737-400 విమానాలను నడిపే అర్హత ఉంది. రాణి సుథీదా కూడా పలు పౌర విమానాలను నడిపారు. 2010లో పైలట్‌గా పనిచేయడం ప్రారంభించిన ఆమెకు, అందిన సమాచారం ప్రకారం, మొత్తం 1,188 గంటల విమానయాన అనుభవం ఉంది.